Qetilkerdişê cinîyêke û 2 mergê bişik 

2025-04-22 14:09:17


	 

	 

	MERKEZÊ XEBERAN - Wan û Balikesîr de mergê bişik ê di cinîyan û Kastamonu de zî cinîyêke amî qetilkerdiş. 

	 

	Wan de Zehra Gultekîn û Balikesir de zî Ayten M. bi hawayêk şikdar dinyaya xo bedelnayî. Sewbîna Elîf C. zî Kastamonu de amî qetilkerdiş. 

	 

	Wan

	 

	Qezaya Miksî ya Wanî de, cinîya bi nameyê Zehra Gultekîna ke 19 serrî wareyêk veng de merde amî vînayîş. Badê agahdarî, ekîbê weşîye û cendirme sewqê cayê hedîse ameyî kerdiş.

	 

	Cenaze semedê karê otopsî berdî Merkezê Tipî yê Yuzuncu Yil Dursun Odabaşi yê Wanî. Dîyar bî ke Zehra Gultekîn do Miks de bêro definkerdiş.

	 

	Balikesîr  

	 

	Ayten M.ya 75 serrî ke qezaya Karesî ya Balikesîrî de ciwîyena û bi hewteyan xebere ci ra nîna girewtiş, keyeyê xo de mîyanê şert û mercê şikdarî de merde amî vînayîş. Demo ke Ayten M. bi hewteyan hetê cîrananê xo ra nêamî vînayîş, selahîyetdarî ameyî agahdarkerdiş. Polîsê ke kewtî zere kutike spey û lacê cinîye Ş.M.yî dir rî bi rî mendî. Polîsan lajê cinîye ra pers kerdî ke ‘dayîka to ça ya?’ Ş.M. dîyar kerd ke dayîka ey rakewtîya. 

	 

	Polîsan dî ke dayîke Ş.M. dinyaya xo bedelnaya û Ş.M. zî destbend kerdî. Mudaxaleyê yewin ê ekîbê tibî de tu kuyayîş yan zî birnayîşêk tûj nêame vînayîş. Cenazeya cinîya ke sey "mergê bişik" amî qeydkerdiş, semedê otopsî wedarnayî Sazgehê Tipê Edlî.

	 

	Derheqê hedîse de cipersayîş ame destpêkerdiş.

	 

	Kastamonu 

	 

	Vizêrî Elîf C. Kastamonu de keyeyê xo de binê şert û mercê şikdarî de merde amî vînayîş. Badê boya ke apartmanî ra amî polîs û ekîbê weşîye ameyî agahdarkerdiş, ame dîyarkerdiş ke Elîf C. netîceya kuyayîşê çîyêk tûjî de dinyaya xo bedelnaye.  

	 

	Çarçewaya cipersayîşî de derheqê hedîse de ame kerdiş de vejîya werte ke Elîf C. hetê camêrdo ke ci dir ameya zewicnayîş B.C ra ameya qetilkerdiş. Kiştoxê Elîf C. ame tepiştiş.