Dayeyê welidnayîşî zêde yê la polîklînîkî kêmî yê  

2025-08-18 09:14:16


	 

	AGIRÎ - Hemsereka SES'î ya Agirî Azîze Ertaş derheqê qelsîyê nêweşxaneyan û întîxarê zêde bîyê de qisey kerd û va, Agirî de dayeyê welidnayîşê zêde yo la polîklînîkî kêmî yê. Azîze Ertaş wina va: “Hedîseyê întîxarî yê mabêne emrê 14-18ine de zêde bîy. No problem muhîmîyê komelî yo. Sebebê nê polîtîkayê sîyasî û komelî yê dewlete yê.”

	 

	Tirkîya wareyê weşîye de problemî her ke şinê giran benê. Bi taybetî semedê kêmbîyayîşê polîklînîkê welidnayîşê cinî nêeşkenê xo biresnê xizmetê weşîye. Hemsereka Sendîkaya Kedkarê Xizmeta Weşîye (SES) Azîze Ertaş ya nêweşxaneyê Dewlete yê Hamurî de şuxilêna, derheqê problemê nêweşxaneyî û hedîseyê întîxarî de qisey kerd.

	 

	Dayeyê welidnayîşî zêde yo la polîklînîkî kêmî yê

	 

	Azîze Ertaş bale ant serê kêmîyê nêweşxaneyê dewlete yê Agirî û wina va: “Agirî de dayeyê welidnayîşî zêde yo, polîklînîkî kêmî yê. Hetê girewtişê randevuyan de problemî est ê. Merdimî nêeşkenê xo biresnê doktoran. No problem bi welidnayîşê cinîyan dir sînordar nîyo. Pêroyî problemî est ê. Semedê nêbîyayîşê hacetê nêweşan, sewqê Erziromî yenê kerdiş. La semedo ke rayîr derg o, nêweşî tesîr benê. Nêweşî rayîrê nêweşxaneyan de dinyaya xo bedelnenê.”

	 

	‘Hedîseyê întîxarî problemêk cidî yê komelî yê’

	 

	Azîze Ertaş va, hedîseyê întîxarî yê mabêne emrê 14-18ine de zêde bîyê û va: “No problemo cidî yê komelî yo. Ganî no trajediyê şexsî nêro vînayîş, no eynî wextî de netîceyê sosyo-ekonomî yo. Agirî de feqîrî her ke şina giran bena, betalî est a. Dayeyê perwerdeyî bi sînor o. Nê semedî ra ciwanî nêeşkenê ameyox awan bikerê.”

	 

	‘Întîxarî yenê normalkerdiş’

	 

	Azîze Ertaş tewr peyîn wina va: “Întîxarî yenê normalkerdiş. Ciwanî semedê zextê keyeyî nêeşkenê fikrê xo vajê, muracatê rayîran danê. Yê ke ganî bêro rêxistinkirin sewîyeya fêmkerdişê ciwanan û hişmendî yo. No problem muhîm ê komelî yo. Sebebê nê polîtîkayê sîyasî û komelî yê dewlete yo.”