Astengîyê vernîya prosesî: Ganî vatişî û pratîkî têduşt bê 2026-04-09 09:46:58   WAN - Hemsereka DBPyî ya Wanî Gonul Uzunay derheqê ke dewlete prosesê cimatê demokratîkî de gamanê somutî nêeştî de qisey kerd û va: “Ganî vatişî û pratîkê dewlete bibo. Ganî vatiş û pratîkê têduşt bibo. Mesele no nîyo ke do Îmraliyî de keyeyêk bêro viraştiş û Birêz Ocalan uca bêro bicakerdiş. Ganî statu bêro naskerdiş, ganî rayîrê Îmraliyî bêro akerdiş û heqê hêvîye bêro naskerdiş.”   Prosesê Aştî û Cimatê Demokratîk dewam keno û her wareyê cuye de semedê ke azadîya fîzîkî ya Rayberê Şarê Kurdî Abdullah Ocalanî pê bêro vengdayîş yeno kerdiş. Proses de semedê nêeştişê gamanê somutî, bêbawerî awan keno û şar veng dano ke ganî lezkî dewlete vatiş û pratîkê xo yew bikero. Hemsereka Partîya Herêmanê Demokratîkî (DBP) ya Wanî Gonul Uzunay derheqê prosesî de qisey kerd.   ‘Bi kodanê înkarê 100 serrî têgêrenê’   Gonul Uzunay wina va: “Lîderê MHPyî Bahçelî hîn vatişan vano la gamêke somutî nêameye eştiş. Wexto ke game nêrê eştiş manaya vatişan zî nêmanena. Çimkî dewlete game nêerzena, şarî dir bêbawerî awan keno. 100 serrî kurdî teberê huqûqî de ameyî verdayîş. Sey ke na herre de nêciwîyenê mojnayîş û sey ‘teror’ ame namekerdiş. Şerê ke 50 serrî yo dewam keno faşîzm û bêtêduştî giranêr kerd. Vengdayîşê Birêz Ocalanî hem semedê aştîya komelî hem zî semedê entegrasyonê demokratîkî û huqûqê kurdan dir bî. Ganî prosesê cimatê demokratîkî de gamî bêrê eştiş. Dewlete bi kodanê înkarê 100 serrî têgêrena. Meclîs de awankerdişê komîsyonî muhîm o la hema raportî de meseleya kurdan sey ‘terorî’ yena girewtiş. Semedê ke proses biherikîyo ganî dewlete meseleya kurdî bi samîmîyet bigîro dest û bizano ke sebebê probleman çira vejîyayî orte.”   ‘Ganî vatiş û pratîkî têduşt bê’   Gonul Uzunay wina va: “Sebebê bêdemokratîkbîyayîşê Tirkîya nêçareserîya problemê kurdî ya. Bahçelî game eşt. AKP goreyê Bahçelî hîn peyser maneno. AKP berjewendîyê xo fikirîyeno, goreyê nê game erzeno. Her di zî goreyê averşîyayîşanê dinya game erzenê; nê semedî ra demî rê vila beno û goreyê xo nêwazenê çareserî virazê. Problemê kurdî wina çareser nêbeno. Semedê çareserîyê probleman ganî cesaret bibo. Tirkîya biwazo xo şeranê hegemonî bipawo ganî demokrasî awan bikero û şarê kurdî binaso. Yanî goreyê rewşe înkarkerdiş yan zî ez aştî wazena, nêbeno. No dano vîndîkerdiş. Ganî dewlete sewîyeya dîyin de game bierzo. Ganî vatişî û pratîkê dewlete yew bibo.”   Mesele keye nîyo: Ganî statu bêro naskerdiş   Gonul Uzunay peynîye de wina va: “Birêz Ocalan kesêk rêze ra nîyo. Aktorê prosesî yo. Ganî statuyê huqûqî bêro naskerdiş. Birêz Ocalan muxatab o. Birêz Ocalan 27 serrî yo bi hawayêk bêhuqûqî Îmraliyî de yeno girewtiş. Mesele awankerdişê keyeyî Îmraliyî nîya û bicakerdişê keyeyî nîya. Ganî statu bêro naskerdiş, ganî rayîrê Îmraliyî bêro akerdiş, ganî heqê hêvîye bêro naskerdiş. Ganî her kes şêro Birêz Ocalan bivîno. Birêz Ocalan binê tecrîdî de yo. Ganî no heqê hêvîye bêro naskerdiş. Ganî şarî cuye pîya awan bikerê. Ganî yewîya demokratîk pê bêro, ziwanê kurdan, kulturê kurdan bêro naskerdiş, tepişteyî bêrê veradayîş.”