Tuncay Sonel bi nasnameyêk sexte ame destbendkerdiş! 

2026-04-18 13:33:18


	 

	DÊRSIM - Cipersayîşê Gulîstan Doku de vejîya orte ke gumanbaro esasî, Walîyê Dêrsimî yê verên Tuncay Sonel, bi nasnameyêk sexte Xerpêt de otêlêk de mendo.

	 

	Agahîyêka bîna balkêş derheqê cipersayîşê Gulîstan Dokuye de vejîya orte ke demêk derg o bala rayepêroyî ancena, derheqê Walîyê Dêrsimî yê verên Tuncay Sonelo ke sey gumanbaro esasî yê dewa yeno binamekerdiş, agahîyê neweyî ameyî bidestkerdiş.

	 

	Goreyê agahîyanê ke ameyî bidestkerdiş, wexto ke derheqê Tuncay Sonel de qerarê destbendkerdişî û tepiştişî ame dayîş, o bi nasnameyêk sexteyî otêla Sheraton a Xerpêtî de mendo. Dimayê ke cayê Tuncay Sonel dîyar bi, polîsan ey destbend kerd.

	 

	Avûkatê Gulîstan Dokuye, Alî Çîmen hesabê xo yê Xî ser o nê çî pare kerd: “Tuncay Sonel, serekê rêxistinêk sucdarî cayo ke bi nasnameyêk sexteyî xo nimitêne, ame tepiştiş. Beşê sîberî yê na rêxistina sucdarî zî mîyanê dosya de bi delîlan est ê. Mendişê otêlêk de bêqeydkerdişî bi nameyê xo sextekerdişê belgeyê taybet û sextekerdişê fikrî yo.”

	 

	Tuncay Sonel ke dimayê ke ame destbendkerdiş berdî Erzirom, pabeyê ke îfadeyê ci bêro girewtiş.