‘Helwesto ke têgêrayîşê sosyalîstî bigîrê muhîm o’ 2026-04-29 09:37:19   Nûjîn Nazlican Yildiz   ÎZMÎR - Parlamentera DEM Partî Burcugul Çubuk dîyar kerd ke nê prosesî de helwestê ke têgêrayîşê sosyalîstî yê Tirkîya bigîrê muhîm o û va: “Her xebate derheqê aştîye ke ma kenê ganî ma qalê heqê kurdan, astengkerdişê û xespkerdişê heqê kurdan û netîceyanê nê bikerê.”   Prosesê Aştî û Cimatê Demokratîkî ke Rayberê Şarê Kurdî Abdullah Ocalan da destpêkerdiş dewam keno û hema zî îqtîdar gamêke nêeşta. Heto bîn de zî helwestê têgêrayîşê sosyalîstî û têkoşînê înan nê prosesî de muhîm o.   Parlamentera Partîya Têduştî û Demokrasîyê Şaran (DEM Partî) yê Îzmîrî Burcugul Çubuk derheqê prosesî de gamanê ke ganî bêrê eştiş û helwestê têgêrayîşê sosyalîstî qisey kerd.   ‘Semedê xelasîya Kurdistanî gamêke pîl ameye eştiş’   Burcugul Çubuk va ke têgêrayîşê sosyalîstî yê Tirkîya hemverê problemê kurdî parçe parçe vindertî û va: “Hemverê problemê kurdî û Kurdistanî nêzdîbîyayîşê înan vurîyeno. Yê tewr xo dano teber helwest hemverê şovenîzmî yo. Têgêrayîşê Sosyalîstî yê Tirkîya îdeolojîya serdestî yê bêtêduştîye ra qût nêbenê. Nê semedî ra pey argumanê dewlete manenê. Na mesela cidî ya. Têgêrayîşê azadîya kurdî meseleya xelasîya Kurdistanî de gamêke pîl eşt. Şarê kolonî na çareserîya problemî de beno ke zaf stratejîyan wayîr bibê. Na mesele eşkena mîyanê sîstemî de bêro çareserkerdiş, bi şorişî bêro çareserkerdiş. Ma vînenê ke bê ke sîstemêk bêro rijnayîş, kewto prosesêk çareserîye. No verê zî pê amebî.”   ‘Helwestê têgêrayîşê sosyalîstî muhîm o’   Burcugul Çubuk bale ant helwestê têgêrayîşê sosyalîstî yê Tirkîya û va ke proses de helwestê ke ê bigîrê muhîm o û wina dewam kerd: “Ma kêmasîyanê cidî ciwîyenê. Hetê cebheyê Tirkîya de ma sinifê karkeran nêkerd esasê têkoşînê aştîye yê şaran. Ma çiqas merkez ê? Semedê ke derheqê sinifa karkeran de rastîyêka têgêrayîşê sosyalîstî çin a, pozîsyonêk ke tewrê têkoşînî bibê zî çin o. Tîya de problemê cidî est ê. Yanî ma semedê aştîye çalakîyanê pîlî yê karkeran rêxistin nêkenê. Ma têkoşînê aştîye de tengasîyanê pîlî de yê.”   ‘Ganî têgêrayîşê sosyalîstî dêsanê xo birijnê’   Burcugul Çubuk wina dewam kerd: “Têgêrayîşê sosyalîstî cayê ke ganî hêz bido aştîye, xo dano het. Ma nê rexneyî bi asanî kenê. Kurdî kewtî pabebîyayîş. Dewlete ra pabebîyayîşê înan est o. Ma çi kerd? Ma xeta çalakîye ke o pabebîyayîş pê bêro awan kerd gelo? Ma kuçeyan de têkoşînê aştîye rêxistin kerd. Ma têkoşînê aştî û sinifa pîya dî. Nê, ma nê nêkerd. Ganî têgêrayîşê sosyalîstî yê Tirkîya dêsanê xo birijnê. Ganî gamî bêrê eştiş. Derheqê prosesî de teberê raporê komîsyonî çîyêk destê ma de çin o. Hewcedarîya desturêk bingehênî yê neweyî çin a. Ganî peynîya bi praktîkê xeletî bîyarê û no zî bi xo bes keno.“​​​​​​​​​​​​​​​​