Aktîvîsta enternasyonalîste: Cinî Rojava de azadîye mûnenê 2026-05-01 11:30:57     Bêrîtan Tunç   ÎZMÎR - Aktîvîsta Alman Marla Zîmmer da zanayîş ke Rojava de azadîya cinîyn hem rêxistinê cinîyan ê xoserî de hem zî di rêxistinê pêroyî yê cimatî de wayîrê cayêk muhîm a û va: “Fikrê Abdullah Ocalanî, babete azadîya cinî newe ra ard rojeva cimatî.”   Cuya azadîwaz a Rojava bi serkêşîya cinîyan ameya awankerdiş; bi hêrişanê zafhetî yê zîhniyetê serdest ê mêrde, çeteyê DAIŞ û HTŞ’yî ra hedef yenê girewtiş. Hêrişanê hemverê Helebî dir destkewtişê cinîyan hedef ameyî girewtiş û pêwa nê hêrişan cinî rêxistibîyayîşê xoser û pawitişê cewherî yê esasê paradîgmaya azadîya cinî ya Abdullah Ocalanî de bîyayîşê xo pawenê û cûyêka alternatîf ronenê.   Aktîvîsta Alman Marla Zîmmer ke heyetê enternasyonalîst ke hemverê hêrişanê HTŞ û çeteyanê girêdaye yê ci hemverê taxanê Şêxmeqsûd û Eşrefiye yê Helebî de ca girewtêne, derheqê modelê azadîya cinî de JINNEWS’î rê qisey kerd.   ‘Xoserîya cinîyan gamêka muhîm a’   Marla Zîmmer da zanayîş ke Rojava de xoserîya cinîyan gamêka muhîm a û nê hetî de paştîdayîş danê averşîyayîşê hêzê cinîyan ê kolektîf. Marla Zîmmer wina dewam kerd: “Seranserê prosesê patrîyarkal cinî girêdayeyê mêrde ameyê verdayîş. Coka rêxistinkerdiş û xoîdarekerdişê cinîyan muhîm o. Rojava de îdarekarîya xoser ê cinîyan dewletan ra xoser a. Pratîk de azadîya cinîyan wayîrê muhîmîyêk merkezî yê pîl o. Xeylêk nimûneyê somutî yê îdarekarîya xoserî ya cinîyan est ê. Kooperatîfê cinîyan îmkanêk pîl ê ekonomî danê cinîyan. Yo bîn hêzê asayîşê herêmî yo. Yewineyê cinîyan yê xoser est ê. Vernîya ke mêrde ra paştîdayîş bigîrê çareserîyan pê anê. Keyeyê Cinî, merkezê muracatî yê hemverê şîdetî yê. Ê hemverê şîdetî têkoşîn kenê.”   ‘Cuya azad a bi akademî û Jinwar re ameya mundiş’   Marla Zîmmer bale ant akademîyanê ke ameyî awankerdiş, dewê Jinwarî û va ke nê nimûneyê tewr muhîm ê. Marla Zîmmer na mesele de wina va: “Dewê Jinwarî cinî bi tutanê xo cuya kolektîf mûnenê. Sewbîna destpêkê şorişî heta nika cinîyan heqanê tewir bi tewir yê asayîşê îdarekarîya xoserî binê asayîşî, bi dest kerdî. Heqê tayînkerdişê qedera xo, heqê rêxistinbîyayîşê xoser, heqê ciwîyayîşê kulturê xo û sîstemê hemserekî. Cinîyan cuya azad bi awankerdişê akademî û dewanê Jinwarî mûnayî.”   ‘Fikrê Abdullah Ocalanî azadîya cinî ard rojeva cimatî’   Marla Zîmmer dîyar kerd ke awankerdişê îdarekarîya xoser ê Vakur û Rojhelatê Sûriye, xo seperneno fikrê Rayberê Şarê Kurdî Abdullah Ocalanî û na babete de zî nê çî ard ziwan: “Abdullah Ocalan vano bê azadîya cinî cimat zî azad nîyo. No fehm rêxistinbîyayîşê cimatî yê Rojawanî de bi zelalî yeno vînayîş. Azadîya cinî hem rêxistinê cinîyan yê xoser de hem zî rêxistinê pêroyî yê cimatî de wayîrê cayêk muhîm a. Fikrê Abdullah Ocalanî azadîya cinî ard rojeva cimatî. Cinî pawitişê şorişî de rolêk muhîm kay kenê. Hemverê hêrişan cinîyan cepheyê vernê de ca girewt. Cinîyan pawitişê cewherî de rolê serkêş girewt xo ser. Pawitişê şorişî de cinî hem sewîyeya leşkerî hem zî sewîyeya cimatî de rolêk pîl kay kena. Tecrubeyê Rojava wayîrê manayêk global o.”