‘Semedê aştîyêk bi rûmet ganî failî bêrê vînayîş’ 

2026-05-23 14:21:55


	 

	STENBOL - Endama Heyetê Îmralîyî Pervîn Buldan çalakîya Dayîkanê Şemî de dîyar kerd ke ê wazenê yewîyeya ke Wezaretê Edaletî awan kerda bi babeta vînîbîyayan meşgul bibo û va: “Eke vînîbîyayêk est o, fail zî est o.”

	 

	Merdim-Dayîkê Şemeyî bi waştişê “Vînîbîyayî bêrê vênayîş, kiştoxî bêrê muhakemekerdiş” serra 1104ine de Meydanê Galatasarayî de çalakîya xo ya hewtane viraşte. Dayîkê Şemeyî, merdimê vînîbîyayan, endam û îdarekarê ÎHD’yê Stenbolî, endamê Heyetê Îmralîyî yê DEM Partî Mîthat Sancar û Pervîn Buldan, Hemserekê DEM Partî yê Stenbolî Çinar Altan û zafê pawîtoxê heqanê merdiman tewrê çalakîye bîyî. Çalakîye de resmê vînîbîyayan ameyî wedaritiş.

	 

	Serra 1104ine de Dayîkê Şemeyî, aqûbetê Pîro Ayo ke 15ê gulana serra 1994ine de amebî destbendkerdiş persayî. Eşkerayîye hetê Merdimê Şemeyî Jiyan Kaya ra ameye wendene.

	 

	Jiyan Kaya dîyar kerd ke her kes seba roşanêko bîn bi kelecan o, labelê ê seba aqûbetê merdimanê ke ameyî vînîkerdiş û failê înan bêrê mehkûmkerdene tîya de yê û wina va: “Çiqas îqtîdarî bedilîyayî zî, polîtîkayê bêcezaverdayîşî her wext dewam kerdî. Ma serra 1104ine de seba Pîro Ayî tîya de yê. 15ê gulana serra 1994ine de qezaya Dêrikî de leşkeran dest bi operasyonêk kerd. Leşkeran Pîro Ay û dewijê bi nameyê A.D. bi sebebê ‘hetkarî dayî rêxistine’ destbend kerdî. Dima ra semedê qewmîyayîşê keyeyê Pîro Ayî seba musayîşê aqûbetê ci, koyan û newalan de ey geyrayî û verê çemêk de rêça gonî vînayî. Dima ra tu xebere Pîro Ayî ra nêameye girewtene. Babîyê Pîro Ayî Bedîr, lezkî li Qerekolê Uçyolî, Fermandariya Cendermeyan ê Dêrikî û Dozgeriya Dêrikî, labelê pêwa heme hewldayîş û muracaatan zî eynî cewab ame dayene; ‘Pîro Ay nêameyo destbendkerdiş’.”

	 

	Jiyan Kaya destnîşan kerd ke dimayê ke qewmîyayîşî ser ra 18 serrî vîyartî, bi hewldayîşê ÎHD’yê Mêrdînî tehqîqat ame destpêkerdene û va: “Serdozgerîya Komare ya Mêrdînî 6 rîdayîşê cîyayan de îddianame amade kerd. 16ê Temmuze 2012ine de bi qiseykerdişê ‘şik bibo û çin bo zî keyfî zafê merdimî ameyî kiştene, no ame tespîtkerdene’ îddianame de ca girewt. Mîyanê nê demî de Musa Çîtîl sey Fermandarê Cendermeyan ê Qezaya Dêrikî wezîfedar bi. Bi qebûlkerdişê îddianameyî, derheqê Musa Çîtîlî de dewa ameye akerdene. Labelê dewa de polîtîkaya bêcezamendişî kewte falîyet û Musa Çîtîl beraat kerd. Heqê ma est o ke ma rastîye bîzanê. Merdimê ke verê çimanê keyeyî de Pîro Ay destbend kerd, kam bîyî? Çi bi sereyê Pîro Ayî ame? Çend serrî derbas bibê wa bibê, ma do aqûbetê merdimanê vînîbîyayan bîpersê.”

	 

	Pervîn Buldan zî qisey kerd û ard ziwan ke têkoşînê înan do dewam bikero û wina va: “Wezaratê Edaletî yewîyeyêk awan kerd. Ma zî wazenê o yewîne dest bido ma û bi dejê ma rê zî mrşgul bibo. Ma vanê ke eke vînîbîyayêk est o, fail zî est o. Eke aştî pê bêro, ganî failî zî bêrê vênayîş ke aştîyêka biqedr pê bêro.”

	 

	Çalakîye bi ronayîşê qerenfîlanê Meydanê Galatasarayî peynî arde.