‘Ma hemverê komployî Saraçxane de yenê têhet’ 

2026-10-08 10:33:11


	 

	STENBOL - Zînet Teymur semedê çalakîye ya ke do 28ine serrgêra Komploya Mîyanneteweyî de Meydanê Saraçxaneyî yê Stenbolî de pê bêro venga tewrbîyayîşî kerd û va: "Semedê veng vetişê komployî û azadîya fîzîkî ya serekî ma heme şaran 9ê teşrîna peyêne de dawetê Saraçxaneyî kenê."

	 

	Platformê Sazîyanê Demokratîkî yê Stenbolî 28ine serrgêra Komployê Mîyanneteweyî yê 9ê teşrîna peyêne 1998ine de, bi sloganê "Semedê Aştî û Cimatê Demokratîkî azadî Birêz Ocalan rê" Meydanê Saraçxaneyî yê Fatîhî de çalakî yena organîzekerdiş. Çalakîya ke serrgêra komployî de 9ê teşrîna peyêne de saete 18ine de do pê bêro de, yeno hedefkerdiş ke komplo bêro şermezarkerdiş û waştişê aştîye vejîyo orte.

	 

	Verfeka Partîya Herêmanê Demokratîkî (DBP) ya Herêma Marmarayî Zînet Teymur derheqê çalakîye de qisey kerd û venga tewrbîyayîşî kerd.

	 

	'Komplo nêresa armancê xo'

	 

	Zînet Teymur va ke armancê komployî no bî ke Abdullah Ocalanî şarî ra dûr bifîno û va: "Hêzanê komployî plan kerdî, vatêne do PKK vila bibo. La Birêz Ocalan bi pawitişname û paradîgmaya xo sîyaset veng vet. Ne şarê kurdî fek Ocalanî ra verada, ne zî ey fek xebat û şarê xo ra verada. Eksê nê têkoşîn pîl kerd. Felsefaya ey her cayî vurîya bi rêxistinbîyayîşî."

	 

	'Cinîyî bi felsefaya Ocalanî xo rêxistin kenê'

	 

	Zînet Teymur bale ant rolê cinîyan ê têkoşînî û wina va: "Ma cinî tu rey felsefaya Birêz Ocalanî ra nêvisîyayê. Ma xo resnenê her cinîyêk rê û xebatêka xurt mûnenê. Ma heme qezayanê Stenbolî de meydanan de yê. Ma wazenê ke azadîya fîzîkî ya Abdullah Ocalanî pê bêro û vernîya sîyasetê demokratîkî bêro akerdiş. Birêz Ocalan gamanê lazim eşt. Nika dora dewlete ya la dewlete xo eştişê gaman ra dûr dana."

	 

	Venga Saraçxaneyî

	 

	Zînet Teymur wina qedêna: "Armancê çalakîye ya 9ê teşrîna peyêne no yo ke tecrîd bêro şiknayîş û vernîya sîyasetê demokratîkî bêro akerdiş, gamê semedê çareserîye bêrê eştiş. Semedê vengvetişê komployî û azadîya fîzîkî ya serekî, ma heme şaran 9ê teşrîna peyêne de dawetê Saraçxaneyî kenê."