‘Ganî cinîyê kurdî bi ziwanê xo destek bigîrê’

2026-10-17 10:49:40


	 

	Melîke Aydin

	 

	STENBOL - Tora Cinîyanê WAVE Elena Florîanî dîyar kerd ke lazim o ke cinîyê kurdî mekanîzmayê hemverê şîdetî de bi ziwanê xo xizmet bigîrê, piştîdayîşê înan bêro kerdiş.

	 

	Seranserê Ewropayî de yew problemo ke tewr zêde cinî rêxistinê cinîyan ciwîyenê, xurtkerdişê mekanîzmayê piştîdayîşê femînîstî û xoresnayîşê xizmetî yê cinîyê ke rastê şîdetî yenê, yo. Tora Cinîyanê Hemverê Şîdetî yê Ewropayî (WAVE) Elena Florîanî va ke 46 welatan ra dayeyan kom kerdî û goreyê nê dayeyan rêxistinê cinîyan eynî probleman ciwîyenê. Elena Florîanî va ke xizmetê ke yenê dayîş qîm nêkenê û lazim o ke semedê hewcedarîyanê cinîyan nê xizmetî bêrê ercnayîş. Elena Florîanî va ke bi taybetî cinîyê kurdî lazim o ke bi ziwanê xo xizmet bigîrê.

	 

	'Heqê cinîyan de peyserkewtiş est o'

	 

	Elena Florîanî dîyar kerd ke seranserê Ewropayî rêxistinê cinîyan hemverê nê tewir probleman têkoşîn kenê û va: "Ewropa ra ma 46 welatan dayeyan kom kenê û cigêrayîş kenê. Ma welatanê teberê yewîya Ewropayî zî tewrê nê kenê. Çîyê ke ma vînenê no yo ke problemanê ke rêxistinanê cinîyan ê Tirkîya ciwîyenê yê welatanê bînan ra têduşt ê. Çi heyf ke zafê welatan de rêxistinê cinîyan fînansmanê lazimî ra bêpar yenê verdayîş. Heqê cinîyan de peyserkewtişêk est o."

	 

	'Peymana Stenbolî çimeyê esasî ya'

	 

	Elena Florîanî wina dewam kerd: "Cinîyê ke şîdet înan ser o yeno lazim o ke xo biresnê piştîdayîşî. Semedê nê standardê mîyanneteweyî muhîm ê. Peymana Stenbolî nê hetî de çimeyê esasî ya. Peymane semedê cipersayîşê xizmetanê welatan mîqyas a. Na peymane heme Ewropayî de derbasdar a. Feshkerdişê Peymane hetê Tirkîya ra manaya ke nê mîqyasî orte ameyî wedaritiş dano. Peymane hetê ke hesab bêro dayîş de muhîm a. Hêvîdar a ke na peymane Tirkîya de ancî bikewo merîyet."

	 

	'Cinî dimayê stargehî zî hewcedarîya piştîdayîşî vînenê'

	 

	Elena Florîanî va ke xizmetanê şaredarîyan ê semedê cinîyan muhîm ê û wina dewam kerd: "Cinîyê ke stargehan ra vejîyenê demêk derg problemê xoresnayîşê mekanîzmayê piştîdayîşî ciwîyenê. Cinî tena rewşê lezkî de lazim o ke her wext piştîdayîş bigîrê. Cinî dimayê stergahan zî hewcedarîyê piştîdayîşî vînenê. Mekanîzmayê piştîdayîşî de astengîyê ziwan beno problem. Rêxistinê cinîyan semedê çareserîya nê metodanê cîyayan aver benê. Sewîyeya verêne yê muracatî de xizmetê zaf ziwanî muhîm o. Nê xetanê hetkarîye de zafê reyan piştîdayîşê açarnayîşî yeno dayîş."

	 

	'Lazim o ke cinîyê kurdî bi ziwanê xo piştîdayîş bigîrê'

	 

	Elena Florîanî bale ant rewşa cinîyanê kurdan ser o û wina va: "Dimayê muracatî de xizmetê açarnayîşî semedê cinîyanê ke bi ziwanê xo qisey kenê bêro dayîş, xoresnayîşê mekanîzmayê piştîdayîşî zî asan beno. Cinîyê kurdî zî muracatan de lazim o ke bi ziwanê xo xizmet bigîrê. Lazim o ke na mesela de piştîdayîşê cinîyanê kurdan bêro kerdiş. Lazim o ke pêrodayîş û tecrubeyê ca û warêyê xo bîyayîşî zî verê çiman de bigîrê. Ganî hewcedarîyê cinîyan tena  ziwan ser o nêro ercnayîş. Ganî prosesê bînî zî verê çiman de bêrê girewtiş."