Rojda Aydin

 

ŞIRNEX - Dayîka Mehmet Denîzo ke 16 serreyê xo ra zîndan de yo Perî Denîz veng da her kesî ke wayîrê tepişteyan vejîyê û vat: "Ganî bi taybetî ma keyeyî vengê tepişteyan bieşnawê. Waştişê merdim û tutanê ma, waştişê ma yê. Wa tecrîdê serê serekê ma bi peynî bikerê û ey vera bidê. Ma do her ca de bibê vengê tutanê xo."

 

Teda, zordarî û tehdîdê serê tepişteyan roj bi roje her ke şino zêde beno. Bi taybetî zî bi girankerdişê tecrîdê serê Rayberê PKKyî Abdullah Ocalanî dir zîndanan de rewşe hîna giran bî û binpaykerdişê heqê tepişteyan Tirkîya û herême de tepişteyan dest bi çalakîya grevê vêşanîye bêdem û bidor kerdî. Grev rojê 106ine de dewam keno. Nînan ra yew zî Mehmet Denîzo ke serra 2016 de ame tepiştiş û 128 serrî cezaya giran ci rê ameya birnayene. Mehmet 5 serrî û 3 mengî yo zîndan de yo. Mehmeto ke Zîndanê Tîpê Tyê Şirnexî de mendêne, dima ra Zîndanê Girewte yê Tîpê F yê Wanî ame kerdene û nika eynî zindan de tepişte yo. Dayîka Mehmet Denîz, Perî denîz dîyar kerd ke lajê aye 1ê Adara 2019 de zî tewrê grevê ke rayberîya Hemsereka KCDyî û parlamentera Colemêrgî Leyla guven dest pêkerd û nika zî kewto grevê vêşanîye yê bêdem û bidor ke 27ê Teşrîna Peyêne 2020 de dest pêkerd. Perîye bi taybetî veng dayî dayîkan û her kesî kerd ke vengê tepişteyan bieşnawê.

 

'Ganî ma hemverê zulmî bêveng nêmanê'

 

Perîya 75 serrî, dîyar kerd ke tutê înan bi hawayêke bêsûc zîndan de yenê tepiştiş û vat: "Lajê mi Mehmet bi 5 serrî û hîrê mengî yo tepişte yo. Bi serrêke ma nêeşkenê şêrê pêvînayîş. Tu wîcdanî înan çin o. Tu omidê ma dewlete ra çin o. Omidê ma tena dayîkan esto. Wa heme dayîkî seba tutanê xo wirzê serê lingan. Tutê ma ewro bêsûc zîndan de yenê muhakemekerdene. Wa tena dayîkî ney heme kesî wayîrê zîndanan vejîyê û waştişê înan vejîyê. Kezeba ma dayîkan veşêna. Ma tutanê xo 9 mengan pîzeyê xo de wey kenê û dima ra zî zehmetî pîl kenê, la ewro zîndanan de yenê tepiştiş. Eke ma wayîrê tutan nêvejîyê do tu kes wayîr nêvejîyo. Ma kurdî qetî nê zulmî qebul nêkenê û ganî ma ewro zî vera nê zulmî vejîyê."

 

'Tutêk eşkeno çi sucî bikero?'

 

Perîye vat ke lajê aye hema 16 serre xo yê de ameyo tepiştene û vat: "Sûcê tutêke çi yo? Tutê ma bi înan se kerdê? Tutêk eşkeno se bikero? Merdim senî eşkeno tutêke bikero zîndan. Seba ke emrê ey qij serrêke Şirnex de mend û dima ra surginê Wanî ame kerdene. Ma seba rewşa tutanê xo zaf bi endîşeyîn ê. Heme tepişteyî tutê ma yê. Ewro roj roja wayîrvejîyayîşê tutan o. Ewro tutê ma bi hezaran mîyanê dêsan de yê. Ez veng da pêro dayîkan wa wirzê serê lingan. Ma nika tena eşkenê bi telefon qisey bikerê, seba pandemî pêvînayîş çin o. Ma rewşa ey ra bi endîşeyîn ê. Tewr peyîn dîyar kerdibi ke didanê ey dejeno."

 

'Bi 23 serrî yo Serekê ma kerdê binê tecrîd'

 

Perîye dewam de wina vat: "Ewro seba nê bêhuqûqî û nêheqî peynî bibo. Tutê ma zîndanan de bêwayîr mendê. Omidê ma heta ewro dewlete ra çin o. Ma nêheqîyan qebul nêkenê. Wa waştişê tutanê ma bi ca bîyarê. Wa serekê ma vera bidê. Çi heqê înan esto Serekê ma kerdê binê tecrîd. Bi 23 serrî yo Serekê ma kerdê binê tecrîd. Ma wazenê Serek û tepişteyanê ma vera bidê. Bi girankerdişê tecrîdî serê tepişteyan rewşe tewr giran bîya. Vengdayîşê mi oyo; heme dayik û şarê kurdî wayîrê tepişteyan vejîyê. Ma ganî seba tutanê xo edalet biwazê. Ganî ma her ca de bê vengê tutanê xo."