Medya Uren

 

MÊRDÎN - Şukrîye Çoko ke dayîka tepişteyê sîyasî bi nameyê Mizgîn Çoko û Mehmet Çoko ya gumanê xo yê derheqê rewşa tepişteyan de û grevê vêşanî de ard ziwan û vat: "Hemverê bêheqîyan, hemverê bêhuqûqî bi hezaran tepişteyî grev de yê. Ganî her kes hemverê binpaykerdişê heqan vindero."

 

Çalakîya grevê vêşanîye ke hemverê tecrîdê serê Rayberê PKKyî Abdullah Ocalan û binpaykerdişê heqê zîndanan ser o 27ê teşrîna peyêne 2020 de zîndanê Tirkîya û herême de ameybî destpêkerdene roja xo ya 83ine de dewam kena. Şukrîye Çoko dayîka 2 tepişteyê sîyasî ya û semedê pêro tepişteyan vengdayîşê edaletî, vengdayîşê şikitişê tecrîdî kena.

 

Lajê Şukrîye bi nameyê Mehmet Çoko hema emrê xo yê 17 serrî de serra 2008 de ame tepiştiş û 28 serrî ceza ci rê ame birnayîş. Nika zî Zîndanê Tîpê T yê Akhîsarê Manîsayî de yeno tepiştene. Kênaya aye Mizgîn Çoko zî verê serrêke semedê xebatê encumenîya HDPyî ameye tepiştene û 5 serrî ceza ci rê ame birnayene. Zîndanê Tîpê D yê Amedî de yena tepiştene. Mehmet, heta nika tewrê 3 çalakîyê grevê vêşanîye bîyo.

 

'Ma pey çalakîya ey de yê'

 

Şukran Çoko destpêkê qiseykerdişê xo de bale ant serê tecrîdo girankerde û wina vat: "Tepişteyê sîyasî pêro rehîn ameyê girewtene. Dewlete kurdan ra vana, serê çimanê şima de bîrî esto û tepişnenê. Heme zî yan çîyêk nêkerdê yan zî têkoşînê nasnameyê xo kerdê ameyê tepiştiş. La tepişnenê zî bêheqîya înan nêqedêna. Tecrîd, sewîyayêka cor de serê înan de yeno kerdene. Heqanê xo ra yenê mehrumkerdiş. Bi hezaran tepişteyî zî vera nê bêheqîyan, vera tecrîdî kewtê grevê vêşanîye. Çalakîya înan çalakîyêka heqdar a û ma pey waştişê înan de yê."

 

'Ganî ma hemverê tecrîdî wirzê'

 

Şukrane wina dewam kerd: "Bi hezaran tepişteyî pêwa raporê înan ke nêeşkenê zîndan de bimanê esto, reyna yenê tepiştene. Lajê mi Mehmet yew înan ra yo ke mîdeyê ci de problemê girîng esto. Bi rojano semedê tedawî şino nêweşxane. Semedê nê zî karantîna de yeno verdayîş. Xora o surgun de yo. Ma nêeşkenê serdayîşê ey zî bikerê. Rewşa ma ya ekonomî zî dest nêdana. Ma no zî tewirêk tecrîdî nîyo. Ma tecrîd qebûl nêkenê. Ganî ma vera înan wirzê."

 

'Tirkîya de edalet çin o!'

 

Şukrane tewr peyîn wina vat: "Tirkîya de ne heq esto û ne zî huquq esto. Keyeyî yenê mexdûrkerdiş, tepişteyî hetêk ra yenê mexdûrkerdene. Teber û zere de zî tecrîd esto. Ez sey dayîkêke vana 2 tutê mi zîndan de yê. Ez êdî nêeşkena biqedînî. Rewşa înan mereq kena û nê prosesî de zî rewşa înan ra gumanbar a. Ganî ma keyeyî vera nê nêzdîbîyayîşan bibê vengê tepişteyan. Ganî ma çalakîyan rê paştdayîş bidê."