WAN - Newroze rê wexto ke kilm mend û amadekarîyê semedê pîrozbayîşî dewam kenê. Cinîyê Wanijî ke lez dayî xebata xo dîyar kerdî ke coşê wisarî ke ciwîyenê, her het ra semedê înan yeno manaya newebîyayîşî û vatî do her şertî de wareyan de bê.

 

Wan de Meydanê Newroze ya Kelaya Wanî 21ê Adare de roja yewşeme do Newroze bêra pîrozkerdene û semedê nî zî amadekarî dewam kenê. Newroza ke mujdîyanê wisarî dana, hetê kurdan ra zî sey roja xoverdayîş û azadî yena zanayene. Çend rojî verê yê 21ê Adare de adir yeno wekerdene, govende yena geyrnayîş û 21ê Adare de zî cil û belgê adetî û werdî yenê viraştiş. Newroze ke hetê kurdan ra sey roşanê neteweyî ya, sey roja pîlkerdişê têkoşîn, erjo hempar û yewîye ya û semedê nê zî pêro xebatî bi coş yenê kerdene. Cinîyê Wanî coşê Newroze bi vatişê seke, 'Her şert û mercî de bi cilê xo yê adetî meydanan de bî û do reyna meydanan de bê' derheqê Newroze de ercnayîş kerdî.

 

'21ê Adare mujdanîya wisarî ya'

 

Fatma Yorgun ke amadekarîya şitlê erdê xo kena dîyar kerd ke peynîbîyayîşê zimistanî dir erdanê xo dir eleqedar benê û vat: "Cinî ciwîyayîş a, a ke cuye awan kena, rêxistin kena ya. Semedê nê zî menga wisarî de semedê ma xeylêk manayê ci estê. Ma heme karê xo menga wisarî de kenê. Bi taybetî 21ê Adare mujdanîya wisarî ya. Peynîbîyayîşê zimistano sîyayî yo."

 

'Ma do her şertî de meydanê Newroze de cayê xo bigîrê'

 

Fatma tewr peyîn wina vat: "Ma bi rojan verê Newroze cil û belgê xo, kofîyê xo amade kenê. Pêwa cil û belgê adetî ma werdê xo zî şewe ra viraznenê û benê meydanê Newroze. Emsar zî sey her serre ma do cayê xo meydan de bigîrê."

 

‘Newroze azadî ya’

 

Berîvan Kaval ke taxa Karşiyaka ya Îpekyolî de esnafî kena wina vat: "Sey her serre ma emsar zî bi kelecan Newroze pawenê. Ma taxe de bi cinîyan dir yenê têhet û şinê meydanê Newroze. Ma bi hawayê roşanî de pîroz kenê. Cinî semedê nê yenê kilê çiman mi ra gênê. Semedê ma Newroze azadî ya."

 

‘Tutîtî de sey Adarok ameyîne xebitnayîş'

 

Sonmez Ertaş zî wina vat: "Newroze serrê peyîn de bi girseyî ame pîrozkerdene. Emrê tutîyê mi de taxe de her kesî 7 beroşê cîya de, fasulye, niha, genim û sewbîna çî pewjnayîne. Sifreyê pîl ameyîne awankerdene û werd pîya ameyîne werdene. Her kesî a roje çi bibayîne, pare kerdêne. Dayîka mi înan vatêne, ‘Adarok’. Mi zêde mana nêdayîne zî la mi fam kerdêne ke yewîye girîng a û ez bi nê adetî pîl bîya."

 

'Pêro baxçeyan de adir ameyîne weykerdiş'

 

Sonmeze dîyar kerd ke dimayê serrê 90yî bernameyê Newroze ameyê qedexekerdene û vat: "Ma zêde mana nêdayîne qedexeyan. Reyna zî ma bi cîranan dir baxçeyê xo de adir weykerdêne û pêwa pêro astengîyan ma Newroz pîroz kerdêne. O wext belkî nêverdayîne welatî meydanan de bêrê têhet. La welatijan baxçe de adir wey kerdêne."

 

'Ma bi cilanê xo meydanê Newroze de yê'

 

Sonmeze tewr peyîn win avat: "Şertî çi benê wa bibê, ma do cinîyê kurdî sey her serre emsar zî Newroze bi cil û belgê xo yê adetî meydan de pîroz bikerê. Ma pawenê ke emsar zî meydanê Newroze de bêrê têhet. Omidê ma oyo ke Newroze biba wesîleyê aştîye."