RIHA - Dayîka Aştîye Adalet Çay ke bi 5 mengî hepsê keyeyî de ya, kelepçeyê elektronîk kerdê lingê aye. Adalete dîyar kerd ke emrê aye pîl o û xeylêk nêweşîyê aye estê û vat: "Semedê waştişê ma yê aştîye ma destbend kenê, tepişnenê û kelepçe kenê linganê ma!"

 

Riha de 6ê teşrîna verêne 2020î de Dayîkê Aştîye Adalet Çay, Hadlê Ogûr, Fatma Akbaş û Meyaser Korkmaz bi 8 kesê bînî dir sereştişê keyeyan de ameybî destbendkerdene. 9 rojî yo Mudurîyê Polîsan ê Rihayî de destbendkerde mendî. Dadgehe Adalet Çay bi qerarê “hepsê keyeyî" û hîrê dayîkê bîn zî bi şertê kontrolê edlî ke do hewte ra hîrê rojan şêrê emnîyet îmza bidê, ameyî veradayîş. Polîsan dimayê 5 mengî hepsê keyeyî da û kelepçeyê elektronîk lingê Adalet Çay de girêdayî.

 

'8ê Adare de ameyî kelepçeyêke newe kerdî lingê mi'

 

Adalete dîyar kerd ke 8ê Adare de zî ameyî kelepçe kerdê lingê ci û vat: "Keye de psîkolojîye mi baş nîya. No zulmêko giran o. Dayîkî tena wazenê ke şer çinbo, kes nêmiro û hesirî çimanê dayîkan nêvarê. 8ê Adare de her kes teber de a roje pîroz kerdêne. La ez zereyê keyeyê xo de bîya. Dima ra ez şîya banyo û veng kelepçe ra ame. Senîn ke veng ame Enqere ra geyrayî. Enqere ra vatî kelepçe xirab bîyo û bi no hawa ameyî yewo bîn kerdî lingê mi. No çi zulm o serê dayîkan de? Ma tena waştişê aştîye kenê. Wa no şer êdî vindero. Semedo ke ma waştişê aştîye kenê m ayenê destbendkerdene, yenê tepiştene û yenê kiştene yan zî kelepçe kenê lingê ma!"

 

'Wazena êdî vejîyî teber'

 

Adalete dîyar kerd ke aye û mêrdeyê xo tena keye de ciwîyenê û vat: "Reyan lazimîyê mi virazênê la ez nêeşkena vejîya teber. Eke ez zereyê keyeyê xo ra vejîyî, Enqere rê zanayîş şino. Ez seke binê tecrîdî de ya. Wazena êdî vejîyî teber. No kelepçe lingê mi dejneno. Ez nêzana heta key no kelepçe lingê mi de bimano. Destê înan de yo na rewşe la na rewşe psîkolojîyêk xirab serê mi de keno."