Oznur Deger

 

ENQERE - Cinîyê ke semedê pîrozbayîşê Newroze xo amade kenê, dîyar kerdî ke Newroze ‘xoverdayîş û bîyayîş a' û vatî: "Wa cinî cuye û azadîya xo bipawê. Semedê rojê tewr weş meydanan de bê."

 

Bi ameyîşê menga adare dir xoza de newebîyayîş dest pêkeno û tesîr serê her wareyê cuye keno. Menga adare ke toximê wisarî erzena, xoverdayîşî temsîl kena. Nê rojan ra tewr bi heybetîn menga adare de bêguman 21ê Adare yo. Roşanê Newroze ya 21ê Adare ke mijdayanê wisarî dana û bi pêroyî semedê şarê Rojhelatê Mîyanên û bi taybet semedê şarê kurdî roşanêko girîng o ewro û siba do xeylêk merkezan bi coş bêro pîrozkerdene. Adirê Newroze xeylêk merkezan de ame weykerdiş. Şaristanê herême ra bigîrê heta şaristanê Tirkîya, amadekarîyê Newroze dewam keno. Komîteyê Tertîp ê Enqereyî zî bi sloganê, 'têduştî, edalet, aştî û azadî’ eşkerayî da û veng da heme welatijê Enqereyî kerdî ke 21ê Adare de saete 13ine de Meydanê Anadolu de bêrê têhet.

 

Remzîye Guçlu û Zelîha Unlu yê ke qezaya Mamakî ya Enqereyî de ciwîyenê, derheqê Newroze de amadekarîyê xo dewam kenê. Remzîye û Zelîha vengdayîşê tewrbîyayîşê pêro cinîyan kerdî.

 

‘Newroze; xoverdayîş, bîyayîş û kêfweşî ya'

 

Remzîye Guçlu dîyar kerd ke Newroze semedê înan manayêka girîng îfade kena û wina vat: "Newroze, xoverdayîş a. Newroze xoverdayîş û serkewtişê Kawayê Hesinkar yê hemverê Dehaqo zalim îfade kena. Newroze, Mazlum Doganan ra heta ewro bi xoverdayîş ameya. Newroze tarîxo ayabîyayîşê şarê kurdî ya. Şarê Kurdî na roje sey şayî û roşan pîroz kenê. Newroze roşanê kurdan a. Kurdî bi reng, ziwan û kulturê xo Newroze pîroz kenê. Newroze bîyayîşê ma ma rê dana hîskerdene. Newroze; kêfweşî, xoverdayîş û bîyayîş a."

 

'Do şitlê ma her wext zergûn bibo'

 

Remzîye qalkerdişê xo wina dewam kerd: "Ma her tewir roşanê Newroze pîroz kenê. Tedayî çi benê wa bibê, nêeşkenê vernîya wisarî padê. Do şitlê ma her wext zergûn bo. Newroze wisarê ma ya. Ma bi pêro reng, coş û kêfweşîyê nê serkewtişî roşanê xo pîroz bikerê. Ma pêro şarê xo dawetê Newroze kenê. Ma do bi govende xo adirê Newroze gûr bikerê. Serra vîyarte ma bi çakmakanê xo adirê xo tafîna, ma tilîliyê xo taxan da eşnawit. Ma Newroza xo pîroz kerd. Her şert û mercî de ma do Newroza xo pîroz bikerê. Newroze xoverdayîş a, ma fek xoverdayîşî xo raveranêdanê. Ma do bi coşêke pîl Newroze pîroz bikerê."

 

‘Newroze cuye ya, ma ciwîyayîş pawenê'

 

Zelîha Unlu zî dîyar kerd ke Newroze cuye ya û vat: "Ma do coşê Newroze bidê ciwîyayîş. Newroze semedê mi cuye ya, ma cuye pawenê. Semedê cuye zî xoverdayîş ferz o. Newroze zî xoverdayîş a. Ma her serre vejênê meydanan û xoverdayîş ramojnenê. Wa cinî cuye û azadîya xo bipawê. Wa semedê rojê tewr weş meydanan de bê. Ma bi qerar ê ke cuye bi pêro coşê xo vajê. Ez vengdayîşê tewrbîyayîşî pêro cinîyan kena."