SÊRT - Keyeyê tepişteyan ê Sêrtî, derheqê çalakîya grevê vêşanîye ser o de qisey kerdî û vatî: "Eke çîyêk bi tutanê ma bibo berpirsîyar hukmat bi xo yo. Ma semedê rewşa tutanê xo endîşeyîn ê. Wa waştişê tutanê ma bi ca bîyarê û tecrîdê serê Serekî de peynî bikerê."

 

Teda, zordarî û tehdîdê serê tepişteyan her ke şino tewr giran beno. Çalakîya grevê vêşanîye ya hemverê tecrîdê serê Rayberê PKKyî Abdullah Ocalanî û binpaykerdişê heqanê zîndanan de 27ê Teşrîna Peyêne 2020 de zîndanê Tirkîya û herême de destpêkerdî roja xo ya 118ine de yo.

 

Keyeyê tepişteyan yê Sêrtî derheqê çalakîya grevê vêşanîye qisey kerdî û vengdayîşê peynîkerdişê tecrîdî kerdî.

 

Suleyman Tîmurtaş ke 5 serrî yo tepişte yo, 7 serrî û nîm ceza ci rê ameya birnayîş û zîndanê Orduyî de yeno tepiştiş dayîka ey Kumrî Tîmurtaş tedayê serê tepişteyan de yeno kerdene şermezar kerd û vat: "Wexto ke ma şinê pêvînayîşê ey şew û di rojan ma rayîr de manenê. Heta ke ma şinê pêvînayîş ma xeylêk zehmetîyan ciwîyenê. semedê pandemî bi di serrî yo ma nêeşkenê şêrê pêvînayîş. Wexto ke ma şinê Ordu, cayê ke ma ci de bimanê çin o. Her het ra ma keyeyî zulm û zehmetî cuyenê. Ewro zulm hem ma rê hem zî tutanê ma rê kenê. Ez nêeşkana şêrî pêvînayîş. Lajê mi verê bi 5 serran de Newroza Sêrtî de ame tepiştiş. Newroze suc nîya û her kes tewrê pîrozkerdişî beno. Wexto ke ma şinê zîndan zî ma cigêrayîş ra derbaz kenê. Nê cigêrayîşan de zulm bi ma kenê. Dimayê ke ma pêvînayîş kenê dima hende rayîr ma peyser agêrenê."

 

'Serê tutanê ma de tedayan kenê û tehdîd kenê'

 

Kumrîye dewam de wina vat: "Ma hacetêke tutanê xo rê benê nêdanê înan. Reyan mengî zî mabêne ra derbaz benê, dima ra danê tutanê ma. Reyan zî hacetanê înan peyser ancenê û nêdanê înan. Serê tepişteyan de zulmêko pîl esto. Tutê ma mabêne çar dêsan de bi zulmî dir rî bi rî yê. Sewbîna wexto ke kantîn ra dayîşûgirewtiş kenê xeylêk vay danê înan. Eynî wextî de serê tutanê ma de tedayî estê û înan tehdîd kenê."

 

'Serekê ma vera bidê'

Kumrîyê, bale ant serê çalakîya grevî û vat: "Ez nêzana lajê mi kewto grevê vêşanîye yan ney. Semedo ke ma ra çîyêk nêvano. La wexto ke Leyla Guven dest bi grevê vêşanîye kerdibi lajê mi zî kewtibi grevê vêşanîye û o wext 122 rojan grev de mend. Semedê grevê vêşanîye xeylêk nêweşî ci de peyda bî. Hemverê zulmî tutê ma bedenê xo danê verê vêşanî. Semedo ke mîyanê çar dêsan de yê nêeşkenê çîyêk bîn bikerê. Waştişê ma oyo ke her kes bibo vengê înan. Wa waştişê tutanê ma bi ca bîyarê. Waştişê tutanê ma oyo ke tecrîd û teda wedaryo. Tutê ma wazenê ke no zulm peynî bo. Wa tecrîdê serê tutanê ma bêro wedaritene û no grev peynî bibo. Semedo ke tecrîd peynî bibo xeylêk kesan peynîya cuya xo ard. Ma cuyêka têduşt û seyyewbînan wazenê. Serekê ma vera bidê. Wa heme kesî bibê vengê tepişteyan."

 

'Bi 6 serrî yo lajê xo nêvînena'

 

Dayîka Yusuf Selçuko ke 6 serrî yo tepişte yo û zîndanê Orduyî de yeno tepiştene Halîme Selçuk zî dîyar kerd ke tepişteyan ser o zulm yeno kerdene û vat: "Lajê mi bêsûc û bêhuqûq ewro zîndan de yeno tepiştene. Ma wazenê tutê ma bêrê veradayîş. Ma êdî kiştiş, destbendkerdiş û tepiştişan nêwazenê. Wa berê zîndanan abibê. Zulm ma kurdan rê kenê. Ma keyeyî heta ke şinê pêvînayîş û yenê ma zaf zehmetî vînenê. Semedo ke rayîrî dûrî yê. Bi 6 serrî yo lajê xo nêvînena. Ez nêweşa û şîyîş û ameyîşê ma bi tena sereyê xo îşkence yo. Ez hema zî nêzana ke lajê mi semedê çi ameyo tepiştiş. Bi hawayêke nêheq zîndan de yo. Hukmat her wext serê ma kurdan û tepişteyan de zulm keno."