Elfazî Toral

 

STENBOL - Cinîyan dîyar kerd ke Nobeta Edaletî ya seba azadîya fîzîkî ya Rayberê PKKyî Abdullah Ocalanî ke dîyayê destpêkerdiş bi qerardarî dewam keno û vatî: “Hema ke erê nêbîyo ganî bi lezkî rayberî reyde pêvînayîş bêro kerdiş. Heta ke pêvînayîş nêro kerdiş do çalakîya ma dewam bikera. Ma kişta tutanê xo û serekatî de yê. Wa sere de tecrîd biwirznê û dima ra azadîya fîzîkî pê bîyarê.” 

 

34 aşmî yo Raberê PKKyî Abdullah Ocalanî ra xebere nîna girewtiş. Seba azadîya fîzîkî ya Abdullah Ocalanî her çar hetê dinya de kampanya dîya destpêkerdiş û dewam keno. Sere de Kurdistan û Tirkîya de her cayê dinya de bi hezaran kesî seba azadîya Abdullah Ocalanî û şikitişê tecrîdî têkoşîn keno. 

 

Têkoşîn de bi qerardarî 

 

Çarçeweya kampanyaya de 27ê Teşrîna Peyêne de tepişteyê sîyasî seba paştîdayîşê kampanyaye dest bi grevê vêşanîye kerdî. Merdime tepişteyan zî Edene û Mêrsîn de seba paştîdayîşî bi sloganê “Seba edaletî ma tecrîdî bişiknê seba aştîye ma bibê vengê zîndanan” dest bi çalakîya Nobeda Edaletî kerdî. 13ê Kanûna 2023yî de bi serkêşîya Komeleya Hetkarîya Keyeyê Tepişteyan Reyde yê Marmarayî (MATUHAYDER) Stenbol de Nobeda Edaletî dîya destpêkerdiş. Kesê ke tewrê çalakîye bîyî mesajê qerardarîya xo ya têkoşînî dayî. Cinîyan çalakîya nobete de waştiş û têkoşînê xo ardî ziwan. 

 

‘Ganî tecrîd bi lezkî wedarîyo’ 

 

Emîne Onala le Nobeda Edaletî de ca gêna dîyar kerd ke ganî tecrîdê serê Abdullah Ocalanî û heme tepişteyan peynî bibo. Emîneye wina vat: “Ma dadî wazenê bi lezkî tecrîdê serê serekatî wa wedarîyo. Ma tecrîdî qebûl nêkenê. Êdî bes o. Ma wazenê vengê xo bi heme kesî bidî eşnawitiş. Wa her kes bibo vengê ma. Ma dadî û keyeyê ke nobete de yê rê serkewtiş wazenê.” 

 

Waştiş û têkoşînî de bi israr ê

 

Emîneye dewamê qiseykerdişê xo de dîyar kerd ke yewî do hêz bida û seba nê çîyî ganî tena dadîyê kurdî nê heme dadîyî berpirsîyarîya xo bîyarê ca û wina dewam kerd: “Heta ke ma dest bidê yewbînan do çîyê weş pê bêrê. Çareyêk bîn çin o. Ma keyeyê xo de ronişê çîyêk nêbeno. Ganî ma tay cehd bikerê û pîya têkoşîn bikerê. Ma nêwazenê gonî birija. Wa çiman ra hêsir nêvarê. Ma seba nê tîya de yê. Ma kişta embazanê xo de yê. Ez do bi înan reyde nobete dewam bikera. Heta ke tecrîd nêşikîyo do têkoşîn dewam bikero. Waştişê ma azadîya fîzîkî ya Abdullah Ocalanî yo. Ganî ma paştîdayîş bidê yewbînan. Ma heme dadîyê Nobeta Edaletî silam kenê. Heta ke waştişê ma pê nêrê ganî ma gamêke tepîya nêerzê.” 

 

‘Ma kişta rayberê xo de yê’ 

 

Cemîle Çîftçîye zî da zanayîş ke do gamêke tepîya nêerzê û wina vat: “Ma seba serekê xo Abdullah Ocalanî ke Îmraliyî de tepişte yo nobete de yê. Tepişte zerre de merdimê înan zî teber de dest bi çalakîye kerdî. Wa kesebaya dadîyan nêvêşa. Ganî hema ke erê nêbîyo keye û avûkatan reyde pêvînayîş bêro kerdiş. Heta ke pêvînayîş nêro kerdiş do çalakîya ma dewam bikera. Ma kişta tutanê xo de û serekê xo de yê. Ma têkoşînî ra gamêke tepîya nêerzenê. Ma do tepîya game zî nêerzê. Kam beno wa bibo ganî paştîdayîş bidîyo. Çi destê ma ra yeno ganî ma bikerê. Ma aştî û azadîye wazenê. Do têkoşîn her tim dewam bikero.”