AMED - Çalakîkerê Nobeta Edaletî reaksîyon nîşanê tehlîyenêkerdişê Halîse Aksoya ke esteyê lajê aye yê HPGyî Agît Îpekî bi kargo aye rê ameybî şirawitiş, dayî û venga serbestverdayîşê aye kerdî. 

 

Roniştişê diyîne yê Halîse Aksoya ke esteyê lajê aye yê HPGyî Egît Îpekî bi kargo aye rê ameybî şirawitiş û bi beyanê îtîrafkar Umit Akbiyikî ameybî tepiştiş, vizêr 10ine Mehkemaya Cezaya Girane ya Amedî de ame dîyîş û Halîse serbest nêameye verdayîş. Cinîyê ke mîyanê çalakîya Nobeda Edaletî de ca gênê derheqê qeraro ke ame dayîş de reaksîyonê xo ajansê ma JINNEWSî rê ardî ziwan. 

 

'Dinya nika bêveng a' 

 

Meryem Soyluye bi nê çekuyan reaksîyon mojna û vat: “Heme dinya nika bêveng a. Kesê ke merdimîyeyê xo vînî kerdî bi kargo cenaze şirawenê Halîseye rê. Ne huqûqî, ne qanûn û ne zî merdimîye dewlete est a. Xora zerrîya dadîye vêşaya û kerdî mîyanê 4 dêsan. Kesê ke vano ke heq û huqûqê merdiman pawena wa deste xo rono serê wijdanê xo û wina têbigêro. 4 û 5 serrî esteyê tutan nêdanê la dima ra maneyêke bi rayîrê kargoyî keye rê yene şirawitiş. Heme dinya nê wehşetî vînena la bêveng a. Kesê ke vanê ez heq û huqûq pawena ganî şermezar bikerê.”

 

 'Zilm bi heme dadîyan kenê’ 

 

Çalakîkera nobete Reşahat Adaye zî qeraro ke ameyo dayîş şermezar kerd û wina vat: “Ewro dadîyê ke pey 7 beran de yê tena yew serrî nê 7 serrî zî xover danê. Na dadîya xoverdayox û qehreman a. Ma nê zilmî qebûl nêkenê. No zilm tena hemverê Halîseye nê hemverê heme dadîyan de yeno kerdiş. Vizêr hemverê dadîya Halîseye de pê ame siba zî beno ke hemverê ma de pê bêro.”

 

Venga Wezaretê Edaletî kerd 

 

Şahîde Hayme, da zanayîş ke Wezaretê Edaletî edalet pê nêano û wezîfeyê xo bi ca nêano û qiseykerdişê xo wina derg kerd: "Ez uca de venga Wezaretê Edaletî kena ke wa wezîfeyê xo bi ca bîyaro. Hem cenazeya ey bi kargo şirawiti û hem zî dadîya ke 60 û 70 serrî ya kerdî zîndan. Eke edaletêk bibayîne no dej nêameyîne ciwîyayîş. Ez înan şermezar kena, wa destê xo bidê serê wijdanê xo û wa dadîya ma serbest vera bidê.