Rozerîn Gultekîn

 

DÊRSIM - Gulfîraz Ale ya ke dimayê serran agêraye serê herra xo bi cinîyan reyde atolyeya hunerê destan de berardiş kena. Gulfîraze vat ke paştîdayîşê cinîyan gird kenê û amancê înan awankerdişê koperatîfê cinîyan o. 

 

Bi averşîyayîşê teknolojîye û bi zêdebîyayîşê şuxilnayîşê ci reyde, çinîbîyayîşê kulturê berardişî zî gird beno. Nê karan ra yew zî viraştişê palasan o. Kulturê palasan Kurdistan de zaf zêde ameyo ciwîyayîş. Xeylê herêman de no xeylê muhîm o û hema zî yeno viraştiş. 

 

Gulfîraz Ale ya ke agêraye serê herra xo Dêrsimî bi cinîyan reyde dest bi berardişî kerd. Gulfîraze bi paştîdayîşê Kooperatîfê Berardişê Xozayî yê Pulurî mamostatîye kena.

 

Agêraye herra xo ser û bi cinîyan reyde dest bi berardişî kerd 

 

Gulfîraze Dêrsim de yena dinya la dima ra koçê Stenbolî kena û Stenbol de zî kulturê xo ra dûrî nêkewena û Komeleya Paştîdayîş û Dewam a Dormeyî ya Çemîşgezekî de rayîrberî kena. Dimayê ke teqawît bena, barê Pulurî kena û atolyeya hunerê destan de mamostatî kena û qezaye de cinîyan rê raşteyê karî akena. Gulfîraze wina vana: “Ez agêraya bajarê xo. Sertîfîkaya mi ya palasan est bî. Mi derheqê babete de serra 2022yî de proje amade kerd, mi tezgah û pêşm peyda kerd. Kooperatîfê Berardişê Xozayî yê Pulurî projeyêk derheqê îstîhdamê cinîyan de bî. Ma wina projeyêke hempar awan kerd. No yew serrî yo ma bi 4 embazê xo reyde palasan virazenê. Îmkanê ma kêmî ke ma dest bidê xeylê cinîyan. Amancê ma awankerdişê kooperatîfê cinîyan o.”

 

‘Paştîdayîşê cinîyan gird beno’ 

 

Gulfîraze wina dewam kerd: “Cinî hepse mîyanê çar dêsan yenê kerdiş. Vera nê de cinî xîret kenê ke xo tewrê cuye bikerê. Ma sey cinîye ekîbêke taybet awan kerd. Ma tîya de dostanî awan kerd. Ma xeylê babetan de çîyan pîya pare kenê. Paştîdayîşê cinîyan tîya de gird beno. Palas xora keda cinîyan a. Netîceyê keda înan de vejîyayo raşte. Ma palasan ser de modelê sey pezkovî, şahmeran yê ke sembolê pîroz yê Dêrsimî yî neqş kenê. Her reng û her modelê palasan ke yeno neqşkerdiş wayîrê hîkayeyêk o.” 

 

Gulfîraze qiseykerdişê xo wina qedênaye: “Ma 8 saetan xebetîyenê. Goreyê kalîte û metre kareyî viraştişê palasan û xalîyan bedilîyeno. Xaliyêke 3 metrekare di embaz di daşme de eşkenê biqedînê. Labelê la barî bibo viraştiş zî derg beno. Ma yew serrî de 5 xalî viraşt. Yew zî viraştişê ci hema dewam keno. Karsazî, dewlete û şaredarî eşkenê seba girdbîyayîşê ma bibê hetkar.”