MERKEZÊ XEBERAN - 61 tepişteyê sîyasî yê cinî yê Zîndanê Evîne de semedê protestokerdişê dardekerdişê Muhammed Qabadlo û Farhad Salîmî dest bi grevê vêşanîye kerdî. Aktîvîstê heqê merdiman û hunermendan zî paştdayîş dayî grevê vêşanîye. 

 

Tepişteyê sîyasî Muhammed Qabadlo û Farhad Salîmî ke 14 serrî tepişte bî, 23yê çeleyî de hetê rejîmê Îranî ra ameyî daliqnayîş. Reaksîyonê hemverê rejîmî yê semedê dardekerdişê tepişteyê sîyasî dewam kenê. 61 cinîyê tepişteyê sîyasî yê Zîndanê Evîne, pêvînayîşê serê telefonî de keyeyê xo ra vatî ke do semedê protestokerdişê dardekerdişê 2 ciwanan 25ê çeleyî de dest bi grevê vêşanîye pêroyî bikerê.

 

Dimayê qerarê tepişteyanê cinîyan, xeylêk hunermend û sîyasetmedaran zî serê hesabê xo de mesaj pare kerdî û vatî ke do paştdayîş bidê grevê vêşanîye. Mîyanê hunermendê mesaj parekerdî de Mehdî Yarrahî, rojnameger Masih Alînejad, şaîr Hassan Homayun û aktîvîstê tepişteyî Sepideh Qalian, Zainab Jalalian û Tomaj Salehî zî est ê.

 

'Vernîya kiştişan bigîrê’ 

 

Hunermend Mehdî Yarrahî ke 30ê Tebaxa 2023yî de ame tepiştiş û dima ra bi şertê kontrolî ame tehlîyekerdiş, bi deyîra ke derheqê rîpêşî de viraşte de, Îranî protesto kerd. Mehdî Yarrahî derheqê babete de serê hesabê xo yê medyaya dîjîtale ra parekerdişê “Ez tewrê 61 tepişteyê cinî yê ke zîndanê Evînê de yê, semedê protestokerdişê înfazkerdişê Muhammed Qabadloyî kewena grevê vêşanîye” kerd. 

 

Hunermendê rapî Tomaj Salehîyo ke semedê deyîranê xo vera ame tepiştiş, bi rayîrê keyeyê xo mesajêk şirawit û vat ke do seba paştîdayîşî dest bi grevê vêşanîye bikero. Eşkerayîya ke serê hesabê fermî yê Salehî de bi rayîrê keyeyê xo, pare kerd de wina yeno vatiş: “Dimayê qetilkerdişê Muhammed Qabadlo û Farhad Salîmîyî 61 tepişteyê sîyasî yê cinî yê ke Zîndanê Evînê de tepişte yê, dest bi grevê vêşanîye kenê. Salehî zî do kişta înan de bikewo grevê vêşanîye. Vernîya cînayetan bigîrê.”

 

‘Bi seyan tepişteyî Îran de paweyê dardekerdişî yê’

 

Cinîya tepişteyo sîyasî yê kurd Muhsîn Mazlumî Havana Tamîsîye zî wina vat: “Sey merdimêka azadîwaştox û muxalîfê rejîmê Komara Îslamî, ez zî pêhesnena ke do tewrê 61 tepişteyê cinî yê Zîndanê Evînê de yê, bikewî grevê vêşanîye. Êdî tena mêrdeyê mi nê Muhsîn Mazlum, bi seyan tepişte ewro Îran de paweyê daliqnayîşî yê. Ganî no hukmat û cînayetê tebere merdimîye peynî bibo.” 

 

Şaîr Hassan Homayunî zî serê hesabê xo yê medyaya dijîtale ra nê mesajî pare kerd: “Semedê paştîdayîşê 61 cinîyê ke do Zîndanê Evînê de bikewê grevê vêşanîye, ez zî do 25ê çeleyî roja panşeme werd nêwera, nêşimna û paştîdayîş bida grevê vêşanîye yê tepişteyanê cinîyan. Waştişê tepişteyanê cinîyan no yo ke çalakî vilayê teberî bibo.”