STENBOL - Avûkatanê Buroyê Huqûqî yê Asrînî seba pêvînayîşê bi miwekîlê xo Rayberê PKKyî Abdullah Ocalanî ke 35 aşmî yo tu xebere nîna girewtiş, muracatê Serdozgerîya Komare ya Bursayî û Midûrîyê Zîndanê Îmraliyî kerd. 

 

Rayberê PKKyî Abdullah Ocalan 25 serrî yo Zîndanê Tîpê Fyê bi Adayîşê Berzî yê Îmraliyî de mîyanê şert û mercê giranî yê tecrîdî de yeno tepiştiş. Abdullah Ocalan û tepişteyê bînî Hamîlî Yildirim, Veysî Aktaş û Omer Hayrî Konar 35 aşmî yo tu agahî nîna girewtiş. Muracatê keye û avûkatan ê semedê pêvînayîşî bi Abdullah Ocalan û tepişteyanê bînan reyde bi hawayêkê sîstematîk binê nameyê “disiplînî” de yenê astengkerdiş. 

 

Heqê pêvînayîşî yê Abdullah Ocalanî û her hîrê tepişteyê bînî yê bi keye û avûkatan reyde bi sebebê “cezayê disiplînî” yenê astengkerdiş. Mabêne serranê 2021-2023yî de her yew ci ra 3 aşmî, tewr tay 5 cezayê disiplînî Abdullah Ocalanî û tepişteyê bînan rê ameyî birnayîş û heqê înan ê pêvînayîşî ame astengkerdiş.

 

Çalakî dewam kenê

  

Demê ke rewşa agahînêgirewtişê mutleq ê Îmraliyî dewam keno de, şarê kurdî û dostê înan Kurdistan, Tirkîya û dinya de bi waştişê azadîya fîzîkî ya Abdullah Ocalanî çalakî û protestoyî dayî destpêkerdiş. Na çerçawa de 10ê teşrîna verêne 2023ine de 74 merkezan de bi sloganê “Abdullah Ocalanî rê azadî, problemê kurdî çareserî” kampanya dayî destpêkerdiş û kampanya kewena aşma çarine. Tepişteyê sîyasî yê zîndanê bakurê Kurdistanî û Tirkîya 27ê teşrîna peyêne 2023 de 106 zîndanan de dest bi grevê vêşanîye kerdî. Keyeyê tepişteyan zî bi eynî waştişî dest bi Nobeta Edaletî kerdî.

 

Hunermendan ra deklerasyonê hempar

 

Nuştox, rejîsor, muzîkjen, rexnegirê hunerî, kaybaz, resam, dengbêj û qada edebîyat û hunerî de 571 kesan 7ê çeleyî de Amed û Stenbol de bi sernameyê “Semedê aştî ma bibê vengêk” deklarasyonêk hempar weşan kerdî. Julîde Kural, Sirri Sureyya Onder, Cevdet Bagca, Nûr Surer, Mîkaîl Aslan û xeylêk kesê bînî mîyanê îmzakaran de bî. Deklarasyon de ame waştiş ke problemê kurdî bêro çareserkerdiş, tecrîdê serê Rayberê PKKyî Abdullah Ocalanî bêro wedaritiş û venga aştiya komelî ame kerdiş. 

 

CPT rê muracat ame kerdiş

 

Komeleya Huqûqnasê Semedê Azadîye (OHD), Komeleya Huqûqnasê Hemdem (ÇHD), Weqfê Cigêrayîşê Komel û Huqûqî (TOHAV), Komeleya Sîstemê Cezaye De Komela Sivîl (CÎSST), baroyê Êlih, Amed, Colemêrg, Mêrdîn, Mûş, Şirnex, Riha û Wan û Komeleya Heqê Merdiman (ÎHD) û Weqfê Heqê Merdiman ê Tirkîya (TÎHV) semedê pêvînayîşê bi Rayberê PKKyî Abdullah Ocalanî û Hamîlî Yildirim, Veysî Aktaş û Omer Hayrî Konar ke Zîndanê Tîpê Fyê Îmraliyî de 34 aşmî yo in agahî înan ra nîna girewtiş pêvînayîş bikerê, 12ê Çeleyî de muracatê Komîteya Vernîgirewtişê Îşkenceyî yê Ewropa (CPT) dayî ke lezkî "pêvînayîş" pêro kerdiş.

 

Raporê çimdarîyê îmraliyî

 

Bûroyê Huqûqî yê Seserre 17ê çeleyî de “Raporê Çimdarî û Tespîtî yê serra 2023ine” derheqê Zîndanê Tîpa Fyê bi Asayîşê Berzî yê Îmraliyî pare kerd. Buroyê Huqûqî yê Seserre raporê xo de vat ke mîyanê serre de semedê pêvînayîşê 169 muracatî ameyî kerdiş la bêcewab ameyê verdayîş. Rapor de wina ame vatiş: “Serra 2023ine bî serra agahînêgirewtişî.” Sewbîna ame vatiş ke ganî serra 2024ine biba serra azadîya Abdullah Ocalan û çareserkerdişê problemê kurdî. 

 

Avûkatan ra muracat

 

35 baroyan hezar û 330 avûkatan semedê bi Rayberê PKKyî Abdullah Ocalanî dir pêvînayîş bikerê, Edlîyeyê Amedî de muracatê Wezaretê Dade kerdî û waştî tecrîdê serê Abdullah Ocalanî peynî bibo. Derheqê muracatê vernîya Edliyeyû Amedî de eşkerayîye ameye dayîş. Eşkerayîye de ame vatiş ke pêvînayîşê bi Abdullah Ocalanî û tepişteyanê bînan reyde bi hawayêkê bêhuqûqî yeno astengkerdiş û veng ame kerdiş ke na rewşa bêhuqûqî bêra peynîkerdiş.