Zelal Tunç

 

WAN - Kampanyaya "Bi jin jiyan azadî reyde ver bi azadîye ra" ya TJAye aşma 5ine de dewam kena. Endama Heyetê Weşanê Jineolojîye Dîlan Yildize 5 aşmê kampanyaye ercna û da zanayîş ke kampanya vera her tewirê şîdetî de têkoşînê azadîye rêxistin kena. 

 

Têgêrayîşê Cinîyê Azade (TJA) Kurdistan û Tirkîya de bi sloganê "Bi jin jiyan azadî reyde ver bi azadîye ra" 15ê Êlule de Riha de kampanya da destpêkerdiş û do heta 8ê Adare kampanya dewam bikera. Xebatê cinîyan çarçeweya kampanyaye de dewam keno. 

 

TJAye Wan de 16ê Êlula 2023yî de startê kampanyaye da. Çarçeweya xebatan de TJA tax bi taxe, raşte bi raşte de xorêxistinkerdiş kerd û atolyeya hişmendîye ya vera şîdetî pê ard. Endama Heyetê Weşanê Jineolojîye Dîlan Yildize 5 aşmê kampanyaye ercna û da zanayîş ke kampanya vera her tewirê şîdetî de têkoşînê azadîye rêxistin kena. 

 

Netîceyê baş vejîyayî raşte 

 

Dîlane dîyar kerd ke çarçeweya kampanyaye de sey jineolojîye atolye pê ardî û wina vat: “Ma atolyeyan de heskerdiş, hişmendî û têkoşînê cînsîyetî munaqaşa kerdî. Atolyeyê têmîyan pê ameyî û ma serê tecrîdî de munaqaşayan kerd. Atolyeyê ma serê nê babetan de ameyî rayîr ra berdiş. Netîceyê baş atolyeyan ra ameyî girewtiş.” 

 

9 bajarê serhedî de atolye 

 

Dîlane dewamê qiseykerdişê xo de da zanayîş ke 9 bajarê Serhedî de atolye pê ardî û wina dewam kerd: “Ma atolyeyê xoser de hişmendîya cînsîyetî ercna û ma paştîdayîş da yewbînan. Ma dî ke lazimîya ma bi yewbînan est a. Nê babetan ser de vindertiş û vejîyayîşê xozaye û tarîxê xo nê rêxistinbîyayîşî gird kerd. Vetişê hemcînsîyetî û berzkerdişê hîsan rêçek giran serê ma de kerd. Atolyeyê têmîyan de zî atolyeyê ‘camêrdîye’ de zî hişmendîyêke vejîya raşte. Ewro babeta camêrdîye bîya sebeb ke cinî xo asayîş de hîs nêkerê. Atolyeyê ke ameyî kerdiş de problemê camêrdî senî vejîya raşte, tesîrêk senî cinîyan ser de kerdo, ame munaqaşakerdiş.”

 

‘Hişê camêrdî kiştişê cinîyan ra weye beno’ 

 

Dîlane qiseykerdişê xo yê peyênan de ard ziwan ke bi serran o şîdetêk gird serê cinîyan de dewam keno û wina peynî kerd: “Esasê ci de hişê camêrd-dewlete yê îqtîdarîyê AKP-MHPyî est o. Ma heme zanê ke sucê vera cinîyan polîtîkayê ke yenê rayîr ra berdiş vera pê yenê. Kampanya bi sozê azadîye yena rayîr ra berdiş. Kampanyaya ma vera her tewirê şîdetî de têkoşînê azadîye rêxistin kena. Ma têkoşînê azadîya cinîye de xo rê vanê, xo rêxistin kena. Ma do azadîya xo têkoşînê rêxistinbîyaye rayîr ra berê. Na çarçewa de ma her roje raşteyan de yê. Jin Jiyan Azadî do seserran rê bibo îlham.”