MERKEZÊ XEBERAN - Têmîyanîya peydakerdişê dermanan taxa Şêxmeqsûdî ya Helebî ke hetê hukmatê Şamî ra girîyayo binê abluqa, dewam kena. 

 

6 serrî yo hukmatê Şamî taxa Şêxmeqsûdî ya Helebî girewto binê abluqa. Çend serrê peyênan de no abluqa resayo merheleyêke tewr cor. Hukmatê Şamî nêverdeno ke gida, kelepulê adirî, werd û derman derbazê taxe bibî. 

 

Goreyê selahîyetdarê Yewîya Dermanroşan ê taxa Şêxmeqsûd û Eşrefîye ke tehdîdê dezgehê asayîşî yê hukmatê Şamî vera nameyê xo eşkera nêkerdî dîyar kerdî ke dezgehê asayîşî nêverdenê ke derman bikewo taxe û eke biverdê zî bi xarac, pereyê miqtarê gird verdenê. 

 

Wirdî taxan de 61 dermanxane estê ke derman 200 hezar kesî rê temîn kenê. Goreyê Yewîya Dermanroşan lazimîya wirdî taxan aşmane dormeyê 3 mîlyar lîreyê Sûrîyeye seba dermanan est o. 

 

Eynî çimeyê xebere dîyar kerdî ke bendê kontrolî yê hukmatê Şamî tena destur danê ke miqtarêk zaf kêm ê dermanan derbazê wirdî taxan, la bac bi qaseyê se ra 10ê qîmetê fatureya dermanan birnenê. 

 

Hema hema eşkeno bêro vatiş ke pêroyê dermanxaneyê wirdî taxan de, dermanê ferz seba şekir (diyabet), tansiyon û kanserî çin o. Eke bibê zî heta ke derbazê wirdî taxan benê, bacêk zaf gird yeno birnayîş. 

 

Vayeya dermanê nêweşîya kanserî mîlyonêk ra heta 20 mîlyonî yo. No vayê goreyê hêzê herînayîşî nîyo û zafaneyê hemwelatijanê wirdî taxan kantonê Efrînî ra koçber bîyî û taxê dormeyê Helebî ra ameyî tîya.