WAN - Cinîyê Wanî yê ke krîzê ekonomîye vera bazarî ra destveng agêrenê wina vatî: “Butçe şer rê yena cîyakerdiş. Kesê ke nê welatî rayîr ra benê, berpirsîyarê nê krîzî yê.” 

 

Tesîrê krîzê ekonomîye yê Kurdistan û Tirkîya her ke şino hîna xorî beno. Vayeya meaşê tewr tay mirdî nêkerd, coka ra zî welat de hetê caardişê lazimîyanê cuye de zehmetî yeno antiş. Yê ke tewr zêde binê tesîrê krîzê ekonomîye de manenê zî cinî û tut ê. Ma mîkrofonê xo dergê cinîyanê yê ke şinê bazarê Taxa Xaçortî ya Wanî kerd. Cinîyan reaksîyon nîşan da vayeyan û vatî ke kesê ke nê welatî rayîr ra benê berpirsîyarê krîzê ekonomîye yê.

 

‘Ne merdimîye menda ne zî wijdan’ 

 

Hatice Boze da zanayîş ke problemê betalîye sey her cayî Wan de zî est o û wina vat: “Krîzê ekonomîye vera xeylê kes dinyaya xo bedelnayî. Kesê dewlemend ancî îdareyê xo kenê la kesê feqîr vêşan manenê. Ne merdimîye menda û ne zî wijdan. Her çî zaf vaye bîyo. Butçeya şerî vera krîz hîna xorî beno. kesê ke nê welatî rayîr ra benê, berpirsîyarê krîzê ekonomîye yê. Keye de mêrdeyê mi, ez û di lajê mi tena manenê. Ma nêeşkenê çîyêk zêde bigîrê. Encax ma eşkenê mirdîyê xo bigîrê. Ma wazenê nê krîzê ekonomîye derbaz bibo. Meaşê tewr tay zêde kerd la gazê xozayî, cereyan, kîra wexto ke yenê dayîş çîyêk deste ma de nêmaneno. Encax ma eşkenê di kilo sebze û di nanan bigîrê.”

 

‘Sebebê esil ê krîzî Erdogan o’ 

 

Elmas Aslane dîyar kerd ke krîzê ekonomîye tesîrê xo serê heme hetan de kerdo û wina dewam kerd: “Sebebê esil ê krîzî Erdogan o. Ma nêeşkenê firingîyan zî bigîrê. Kîloyêk di heb firingî yo. Vayeya îsotê zergûnan bîya 35 TL. Lîmone bîya 20 TL. Ma bi vayeyan do senî herînayîş bikerê? Ma nêeşkenê çîyêk keyeyê xo rê bigîrê. Ma wazenê vayeya her çîyî kêm biba û krîzê ekonomîye peynî bibo.”

 

‘Merdim vera vêşanîye de têkoşîn keno’ 

 

Hanim Ertaşe da zanayîş ke vayeya bazarî her ke şino zêde beno û coka ra zî bazarî ra destveng agêrena û vat: “Krîzê ekonomîye vera şar vêşanîye reyde têkoşîn keno. Ma bi zorî îdareyê keyeyê xo kenê. Bazar de her çî vaye yo. Baharat ra bigîre heta sebze ma nêeşkenê çîyêk bigîrê. Eke dewlete nê krîzî rê çareserî nêvîna do merdimî bieşte îdareyê xo bikerê. Nika gida xora hende vayo ke nêşikeno bêro herînayîş.”

 

‘Kes bedilîyenê la zîhnîyet nêbedelîyeno’ 

 

Şukran Işike zî ard ziwan ke ê nêeşkenê bi meaşê teqawitî îdareyê xo bikerê û wina vat: “Seba ma lazimîyê xo yê cuye bîyarê ca ma di reyan fikirîyenê. Erce pere nêmendo. 100 TL bîyo 1 TL. Kesêk vayeyê ke yenê kerdiş ra razî nîyo. Sebebe esasî yê nê krîzî rayîrberê dewlete yê. Semedo ke krîz çareser bibo ganî rayîrberê dewlete bêrê bedilnayîş. Krîzî vera ciwanî kar nêvînenê û verê xo danê Rojawan.”

 

‘Ma nêeşkenê îdareyê xo bikerê’ 

 

Halime Şekere dîyar kerd ke bi bazarvanîye îdareyê xo kena û wina vat: “Her çî xeylê vay o. Her çî her tim yeno vayekerdiş. Ma nêeşkenê lazimîyê xo yê esasî bîyarê ca. Ma bi zorî îdareyê xo kenê. Hîrê lajê mi bêkar keye de yê. Eke tutê mi kar bivînayêne ez do keye de bimendêne. Her çî zaf bîyo vay. Nan bîyo 10 TL. Wa êdî çîyêk nêro vayekerdiş û çareserîyêk bêra dîyîş.”