Rojda Aydin

 

ERZIROM - Qereçoban de 320 weçînitoxî di adresê awanîyê Mudirîya Emnîyetî ya Qezaya Qereçobanî de ameyî neqlkerdiş. Rêxistina DEM Partî ya qezaye şî Heyetê Weçînayîşî îtîrazê rewşe kerd la binê nameye ‘asayîşî’ de îtîraz ame redkerdiş. Hemsereka DEM Partî ya Erziromî Turkan Sunbule da zanayîş ke bi zanayîş na polîtîka yena rayîr ra berdiş û vat ke ê do 31ê Adare de cewab bidê. 

 

Bi nizdîbîyayîşê weçînayîşê herêmî ke do 31ê Adare de pê bêro, xeylê bajaranê Kurdistanî de neqlkerdişê weçînitoxan pê yeno. Heta nika xeylê bajarê Serhedî de neqlkerdiş ame kerdiş. Partîya Têduştîye û Demokrasîyî yê Şaran (DEM Partî) vera nê caardişanê bê huqûqîyan de îtîrazê xo kerd. Qezaya Qereçobanî ya Erziromî dimayê weçînayîşê pêroyî yê 14ê Gulane 320 weçînitoxê newe qezaye de ameyî neqlkerdiş. Weçînayîşê pêroyî de keyeyê hûmara 14ine ê serê Cadeyê Gunduz ê taxa Hacilarî de tena 3 weçînitox estbî û na hûmara bi nizdîbîyayîşê weçînayîşê herêmî vejîyaye 257 kesan. 

 

Eynî wextî de awanîya 13ine ya serê cadeyê Nêweşxaneyî ya taxa Hacilarî de zî weçînitoxêk qeydkerde bî, la na hûmare zî vejîya serê 63ine. Eynî wext de ame dîyarkerdiş ke di adresê awanîyê Mudirîya Emnîyetî ya Qezaya Qereçobanî de ameyî neqlkerdiş. Rêxistina DEM Partî ya qezaye şî Heyetê Weçînayîşî îtîrazê rewşe kerd la binê nameye ‘asayîşî’ de îtîraz ame redkerdiş. 

 

Hemsereka DEM Partî ya Erziromî Turkan Sunbule derheqê babete de qisey kerd û vat ke vera nê caardişan de îtîraz kerdî.

 

‘Ma zî zanê ke asayîş vera nîyo’ 

 

Turkane ard ziwan ke sey her bajarî Erzirom de zî neqlkerdişê weçînitoxan est o û da zanayîş ke heta nika goreyê tespîtanê înan Qereçoban de 320 weçînitoxî ameyî neqlkerdiş. Turkane qiseykerdişê xo de wina vat: “Qezayanê bînan de heta nika rewşêke winasî çin a. No çîyo ke ameyo kerdiş bêhuqûqî yo û nîno qebulkerdiş. Neqlkerdişê weçînitoxan Kurdistan de zanayîş yeno kerdiş. Ma sey partiye vera nê caardişan de heyete weçînayîşî rê îtîraz kerd. La îtîrazê ma ame redkerdiş. Binê nameyê ‘asayîşî’ de muracatê ma red kerdî. Ma rê vatî ke seba asayîşê weçînayîşî leşker û polîsan ardî. La ma sey DEM Partî vera bê huqûqîyan de xîretkerdişê xo do dewam bikerê. Ma do nê çîyî şarê xo rê zî do baş bîyarê ziwan.”

 

‘Bi zanayîş nê polîtîkayî rayîr ra benê’ 

 

Turkane da zanayîş ke îqtîdarê AKPyî tersê vînîkerdişî vera qeyûman tayînê şaredarîyan keno û wazenê bi nê caardişan ser bikewo. Turkane wina vat: “Bi no hawa nêmend û hîleyê weçînitoxan kerd dewre. La şarê ma qerardar o. Şarê ma do 31ê Adare de hem qeyûman û hem zî hîleyê weçînitoxan bişikno. Qereçoban û Kurdistan de bi zanayîş nê caardişî yenê kerdiş. Wazenê bi heme bê huqûqîyan şaredarîyan bi dest bifînê. La ê zî zanê ke do şarê ma destur nêdo hîleyan. Ma do nê polîtîkayê ke bi zanayîş yenê rayîr ra berdiş çinî bikerê. Ma do hem xo û hem zî Kurdistanî rayîr ra berê. Ma do wayîrê îradeyê xo bivejê. Coka ra zî ma 31ê Adare de serê sindoqan de cewab bidê.”