Pelşîn Çetînkaya

 

AMED - Hemwelatijê Amedî dîyar kerdî ke qeyûm semedê şarî çîyêk nêkerd û wina vatî: "Ma wazenê bi nasname û bi ziwanê xo şaredarîyan rayîr ra berê.” 

 

Kurdistan û Tirkîya de weçînayîşê herêmî do 31ê Adare de pê bêro û xebatê partîyê sîyasî bajarok, qeza û bajaran de dewam keno. Kurdistan de weçînitoxî do şêrê serê sindoqan û wayîrê rayanê xo bivejê. Partîya Têduştîye û Demokrasîyî yê Şaran (DEM Partî) bi verweçînayîşî namzedanê xo dîyar kerd. Kişta xebatê partîyê sîyasî de hemwelatijî zî waştişê xo yê bajarêk senî wazenê anê ziwan. 

 

Hemwelatijê Amedî derheqê weçînayîşê herêmî de, pratîkê qeyûmî yê Amedî de ercnayîşê xo ajansê ma JINNEWSî rê kerdî. 

 

'Ganî bi edaletî xebate bikerê' 

 

Ferîde Kaganaslane qiseykerdişê xo de bale ant serê problemê bajarî û wina vat: “Ma şaredarîyêke baş wazenê û ganî xebatan de edalet bibo. Dimayê ke qeyûm ame tayînkerdiş ma nêşîyî şaredarî. Ma problemanê xo înan rê nêvat. Xora nizdîbîyaîyşê înan dîyar o û şarî rê vanê ‘Şima kam ê?’. Wexto ke şaredarî deste ma de bî, bajar pak bî. Her raşteyêk de 4 yan zî 5 xebatkarê pakîye estbî. Nika raşte hem lêşinê û hem zî dingî xerepnayeyê.”

 

‘Tena şarê ma eşkeno bikero’ 

 

Fatma Kiliçe dîyar kerd ke bajaro ke mîyanê cîyakarîye de nîyo wazenê û wina vat: “Ma şaredarîyêke wazenê ke wa fêde bida bajarî. Ma eşkenê şêrê problemanê xo vajê û çareser bikerê. Ma wazenê ke bajarêk baş neslo newe rê biverdê. Çîyo ke ez vana tena şarê ma eşkeno bikero û fehm bikero.” 

 

'Qeyûm bajarê ma talan kerd' 

 

Aysel Pehlîvane dîyar kerd ke şaredarîyêke bi hêz wazenê û vat: "Xeylê qeyûmî ameyî tayînkerdiş. Ma zî wazenê merdimê ke hemverê qeyûman de sere çewt nêkenê bivejê. Ganî ma wayîrê şaredarîyê xo bivejê. Ganî şaredarî zî hemverê ercanê şarê xo de têbigêra û qîmet bida şarê xo. Ma wazenê kesê ke îradeyê şarê xo nêşiknê bêrê şaredarî. Qeyûm ame tayînkerdiş û bajarê ma talan kerd û heqanê ma îhlal kerd. Her çî goreyê menfîetanê xo kenê. Heta peynîya gonîya xo ma do payan ser de bê. Kam beno wa bibo ma hemverê kesan de xo nêbedelnenê û sere çewt nêkenê.”

 

'Nê welatî de darî, vilikî û herre bi gonî ameyî awdayîş’ 

 

Delal Aktaşe da zanayîş ke rayîrberîyê ke seba şarî bibê derman wazenê û wina dewam kerd: “Şaredarîyê ke do şarî nêxapênê wazenê. Dewlete û qeyûmî ra ver ganî ma rexnedayîşê xo bidê. Nê welatî de darî, vilikî û herre bi gonî ameyî awdayîş. Kesêk ganî na gonîye ser de nêbo şaredar. Kam şaredarî rayîr ra bibo ganî bi berpirsîyarî têbigêro. Xeylê cinî bi şîdetî reyde rî bi rî manenê. Binê banê şaredarîye de xeylê dezgehê cinîyan estbî û xeylê cinî înan dezgehan de xebetîyayî. Cinî bi asanî eşkayêne xo biresnê nê dezgehan. Nika nê dezgehê ke estbî ameyî girewtiş. Dimayê tayînkerdişê qeyûman şaredarî fek xebatan ra verda. Ez heqê xo helal nêkena.”

 

'Ma şaredarîyêke edilane wazenê’ 

 

Fahrîye Ertîke zî sey hemwelatijanê bînan qala pratîkê qeyûman kerd û vat: “Dima ke şaredarîyê ma kewtî deste qeyûman, ma nêeşkayî şêrê banê şaredarî. Ma wazenê kesê ke ma weçînenê ma rayîr ra berê. Ma şaredarîyêke adilane wazenê."

 

'Ma wazenê bi ziwanê xo problemanê xo vajê' 

 

Sabahat Arcagoke wina ercnayîşê xo ajansê ma rê kerd: “Ma şaredarîyê ke kurdkî hîna zêde tede yena qiseykerdiş wazenê. Wexto ke problemê ma virazîyenê û ma şinê şaredarîyan, ma wazenê bi ziwanê xo yê dadîye problemanê xo bîyarê ziwan. Ez wazena tutê ma bi ziwanê xo qisey bikerê. Bi zordestîye şaredarîyan destê ma ra girewtî. Amed de dizdî kerdî û vîşêrê zirarî tu çîyêk nêkerd qeyûmî. Ma wazenê şaredarîyê xo destê qeyûman ra bigîrê. Ma problemê qeyûman nêwazenê."