Melek Avci

 

ANQARA - Dadîya Aştîye Kadrîye Oguz ke Nobeta Edaletî vejîya û ameye Anqara, derheqê ke Wezaretê Edaletî waştişê pêvînayîşî qebûl nêkerdo de qisey kerd û vat: “Ma aştîye wazenê, ê şer. Ma edalet wazenê ê remenê. Wezaretê edaletî ma ra rema. Ma zanê ke o tîya yo. La wezîrê edaletî dadîyan ra rema.”

 

Dadîyan xeylêk cayan de Nobeta Edaletî dewam kenê, rojêke verê Anqara de bîyî. Dadî ewilî şî Merkezê Pêroyî yê Partîya Têduştî û Demokrasîyî yê Şaran (DEM Partî). Cinîyê ke tewrê kombîyayîşê Koma Parlamentoyî yê Cinîyan ê Dem Partî bîyî, semedo ke Wezaretê Edaletî waştişê înan yê zîyaretî qebûl nêkerd, dimayê kombîyayîşê kome dima ra verê berê çapemenîyê meclîsî de eşkerayîye da.

 

‘Wa zext û tecrîd peynî bibo’

 

Şemse Bagdu ya Nobeta Edaletî ra vejîya û ameye Anqara dîyar kerd ke ezîyet rayîr de înan rê ameyo kerdiş û wesayîtê înan ameyê cigêrayîş, ameyê zincîrkerdiş. Şemse wina vat: “Ma semedê Abdullah Ocalanî şîyî Anqara. Ma semedê serekî û tepişteyanê xo tîya yê. Bi aşman o ma semedê edaletî nêşnenê ro. Ma vengê xo berz kenê. Çi kenê wa bikerê, dadî do serê lingan de bê. Kes nêeşkeno ma bitersino. Ma kîşte serekê xo de yê û aştî wazenê. Serekê ma azad nêbo, ma yew azad nêbenê. Wa zextê serê serekê ma peynî bibê.”

 

Semedê dadîyan vengdayîş

 

Şemse dewamê qiseykerdişê xo de wina vat:  “Leşkeran nê zimistanî şirawenê şer. Dinyaya xo bedelnenê. Ez venga dadîyan kena. Wa bêrê tewrê ma bibê. Destê aştîye derg bikerê. No şer do heta ça dewam bikero. No tecrîd heta nêwurzo, ma do têkoşînê xo dewam bikerê.”

 

Wezîr ma ra rema

 

Kadîye Oguz ya nobeta Mersînî ra ameye zî dîyar kerd ke semedê aştî pê bêro û gonî vindero dadî vejîyayê rayîr û wina vat: “Serekê ma rayberê 40 mîlyonî yo. Ewro binê tecrîdêk giran de yo. Tirkîya de edalet nêmendo. Ma aştîye wazenê, ê edaletî ra remenê. Ma zanê ke wezîr semedo ke pêvînayîş nêkero remeno. Ma zanê ke tîya yo. Dadîyan ra rema. Çira aştî û azadîye ra remenê.”

 

‘Serekê ma bidê ma’

 

Kadiye peynî de wina vat: “Ma dadî yê, zerrîya ma kezeba ma veşena. Ma serekê xo wazenê. Ma azadîya tutanê xo wazenê. Lîderê ma Ocalan o. Kilîtê aştîye Abdullah Ocalan o. Wa aştî bêro nê welatî. Wa canê kesî nêveşîyo.”