Dîlan Babat

 

ANQARA - Hemşaredara verêne ya Agirî Mukaddes Kubîlaye ya ke nika zîndanê Sîncanî yê Cinîyan de tepişte ya dîyar kerd ke verweçînayîşê ke DEM Partîye 90 merkezan de pê ard muhîm û manayin o û semedê namzetanê neweyan û wina vat: “Ganî polîtîkayê qeyûmî baş bêrê vatiş, çimeyê cemawerî senî rantî rê yenê xerckerdiş şar rê bêro vatiş. Ganî 24 saetan raşteyan de bê. Mîyanê şarî de bê. Ganî şar bêro goşdarîkerdiş û waştişê înan rê bibê cewab.” 

 

Xebatê partîyê sîyasî yê semedê weçînayîşê herêmî yê 31ê Adare dewam kenê. Hemşaredarê verên yê ke tayînkerdişê qeyûman vera ameyî tepiştiş persanê ajansê ma cewab kerd. Hemşaredara verêne ya Agirî Mukaddes Kubîlaya ke nika zîndanê Sîncanî yê Cinîyan de tepişte ya aşma Kanûna 2016î de ameye tepiştiş. Vera cezaya aye qedîyaya zî qerarê Heyetê Îdarî û Taqîpkerdişî vera nîna serbest verdayîş. 

 

Mukaddese serra 1999î ra nata sîyaset de aktîf ca gêna û mabenê serran 1999-2009î de di demî şaredarîya Bazidî kerd. Mukaddes Kubilaye zîndanê Sîncanî ra derheqê weçînayîşan de cewab da persan.

 

‘Verweçînayîş bîyo nimûne’ 

 

Mukkadese da zanayîş ke DEM Partî bi zîhnîyeto ke îradeyê şarî dano mojnayîş, bi demokrasîyê xo û têkoşînê xo dewam keno û wina vat: “Weçînayîşê herêmî de zî na babete muhîm a. Bi namzetê ke bi fikre xo rayîr ra benê û bajar rayîraberdî no mumkun o. No şertê ewil ê sîyasetê demokratîk o. Tîya de çîyo muhîm verweçînayîşo ke ame kerdiş o û muhîm o. Demê peyênan de modele rêxistinbîyayîşê ma pê yeno. Tay cayan de verweçînayîş ameyî kerdiş û nimûne ameyo girewtiş. La çîyo ke ê kenê caardişê demokrasîyî nîyo, bi zîhnîyetê merkezî kar rayîr ra benê.” 

 

‘Şertê şîyayîşê şaredarîye yê ke sey qerargahî yenê pawitiş nêmendo’ 

 

Mukkadese wina dewam kerd: “Agirî de di reyan weçînayîş ame kerdiş. Di reyan zî AKP hezm nêkerd. Her tim îtîraz kerd û betal kerd. Yê ke rayê xo dayî AKPyî zî bêhuqûqîya ke ame kerdiş qebul nêkerd. Vînenê ke îradeyê şarî ameyo xespkerdiş. Kesê ke ray dayî AKPyî zî turê diyîne de raye dayî ma. Ma bi ferqêk gird weçînayîş girewt. AKP no hezm nêkerd û qeyûm tayîn kerd. Ma di serrî û nîme de xeylê xebate kerd. Ma projeyan vist cuye. Se ra 85ê şarî xebatan ra kêfweş bî. Ma waştişê şarî verê çiman de girewt, probleman tespit kerd. Proje goreyê nê bi paştîdayîşê şarî kerd cuye. La îqtîdar qeyûm tayînê herinda ma kerd û ma tepişt. Heme destkewtişê ma xesp kerd. Şertê şîyayîşê şaredarîye yê ke sey qerargahî yenê pawitiş nêmendo.” 

 

‘Hema ma projeyê xo nêkerdbî dewre qeyûm tayîn kerdî’ 

 

 Mukaddese da zanayîş ke DEM Partî û partîyê verên esasê xo de xebate rayîr ra berdî û hemşaredarê cinî zî na babete de hişmendîya berpirsîyarê xo de bî. Mukaddese qala xebatê verê qeyûmî kerd û vat: “Ganî problemê komelkî yê cinîyan verê çiman de bêrê girewtiş û polîtîka bêrê berardiş. Cinîyan vera tedayan de vatî ‘ma est ê’ û vengê xo berz kerd. Kombîyayîşan de ma bi cinîyan redye rayîr û raybazê çareserîya probleman munaqaşa kerd û ma goreyê înan kombîyayîşan proje aver berd. Ma înan bi projeyan aktîf kerd. Ma şîyî koperatîfê cinîyan. Hem hama projeye xo yê koperatîfî nêkerdbî cuye qeyûm ameyî tayînkerdiş. Ma atolyeya tekstîlî ya cinîyan akerd. Ma bazarê cinîyan akerd. Ma vera tiryak, fuhuşî de têkoşîn kerd. Ma seba tut û ciwanan merkez akerd. Ma ciwanan bi komelî reyde ard têkişt. Ma xebatê kultur û ziwanî rayîr ra berd. Ma kreşe tutan akerd. Ma bazarê şarî akerd. Hema ma dewam kerdêne. Mi hema nîmeyê xebatan Bazidî de kerdbî, temam nêbî. Qeyûm ame xebatê ma nîmcet mend.”

 

‘Ma îtîrazê xo rona raşte’ 

 

Mukaddese ard ziwan ke vera zîhnîyeto ke cinî nêeşkena bikera, nêeşkena rayîr ra biba, sey cinî têkişt de ca girewtiş no zîhnîyetî peçiqna û veng vet. Mukaddese wina dewam kerd: “Bi nê reyde îradeyê azad ê cinî û hêzê aye vejîyeno raşte. Bi azadbîyayîşê cinîye reyde komel nê şima fikiryenê. Yê kehen yeno rijnayîş û yê newe yeno awankerdiş. Ma cinî pîya îtîrazê xo rona raşte. Cinî wayîrê dezgehan vejîya û no zî hêzê îtîrazî mojneno.”

 

‘Ganî polîtîkayê AKP-MHPyî bêrê îfşakerdiş’

 

Mukaddese derheqê weçînayîşê herêmî de zî veng kerd û vat: “Ganî polîtîkayê lêşin yê AKPyî her ca de bêrê îfşakerdiş. Bi pereyo ke şarî ra yeno arêdayîş hetkarî nêdanê şarî. Nê pereyî seke AKP xêrê xo dano mojnenê. Ganî bêusûlîyê şaredarîyan baş bêrê dîyîş. Ganî çimeyê ke rantî rê yeno xerckerdiş baş bêrê vatiş. Ganî 24 saet raşteyan de bê, mîyanê şarî de bê. No çî do hîna xurt bikero. Ganî şar bêro goşdarîkerdiş. Ganî polîtîkayê AKP-MHPyî baş bêrê resnayîş. Ganî feqîrîyo zêde ke est o baş bêro vatiş. Semedê asayîşê sindoqan bêro girewtiş, ganî cehdkerdişêk baş bibo. Ganî wayîrvejîyayîşê sindoqan xurt bo. Ganî asayîşê sindoqan bêro girewtiş. Wa şarê ma heme polîtîkayan veng bivejo. Semedê heme namzetan serkewtiş wazena.”