STENBOL - Dadîyê Şeme seba Maksut Tepelîyî arê bîyî ke Maksut 40 serrî verê cû hetê dewleta tirkan ra zîndan de ameybî qetilkerdiş û cayê gorê ci ame nimitiş.

 

Dadîyê Şeme reya 984ine Raşteyê Galatasarayî de seba persayîşê aqûbetê merdimanê xo yê ke zîndan de ameyî vînîkerdiş û qetilkerdiş û failê înan bêrê muhakemekerdiş kom bîyî. Dadîyê Şeme no hewte aqûbetê Maksut Tepelîyî persa. Maksut Tepelî 2yê Sibata 1984î de wexto ke şîyêne keyeyê embazê xo yê Taxa Kuçukbakkalkoyî ya Ataşehîrî ya qezaya Stenbolî netîceyê gule reşênayîşê polîsan de birîndar bibê û ameybî destbendkerdiş. 

 

Eşkerayî hetê Serêka Şûbeyê Komeleya Heqanê Merdiman (ÎHD) a Stenbolî Gulseren Yolerîye ra ame wendiş.

 

Gulserene ard ziwan: “Wexto ke Maksut nizdîyê keye bî, ferq kerd ke ber şikîyayo û waşt ke uca ra dûrî bikewo la polîs keye de xo nimnaybî, gule reşênayî ci ser û Maksutî birîndar kerdî.” 

 

Gulserene dewamê qiseykerdişê xo de wina vat: “Keye û avûkatê Maksutî yê ke hetê dezgehê fermî ra destbendkerdiş yeno redkerdiş, dimayê 22 serran belgeyê ke tede îspat kenê ke Maksut 6ê Sibata 1984î de Nêweşxaneyê Nimuneyî yê Haydarpaşayî de dinyaya xo bedelnayo, bi dest fînayî. Netîceyê cehdkerdişê 3 serran de selahîyetdarê ferm, qebul kerdî ke Maksut Tepelî Goristanê Bêkesan ê Helvacîdedeyî de ameyo definkerdiş. La semedo ke malumatê cayê gorê ci nêameyo eşkerakerdiş hema zî cayê gorê Maksut Tepelîyî nîno zanayîş.” 

 

Gulserene da zanayîş ke dimayê vînîkerdişê Maksutî vera heme cehdkerdişan, derheqê qewimîyayîşî de heta nika tehqîqatêk cidî nêdîyayo destpêkerdiş.

 

'Ma di tim taqîpkar bibê û fek cigêrayîşê edaletî ra nêverdê’ 

 

Cinîya Maksut Tepelîyî Şehrîban Tepelîye zî nê mesajî ard ziwan: “Kênaya ma ya ma bi Maksutî reyde gird kerd û mi rê vatêne; ‘Gelo ma do tutîye aye û zewacê aye bivînê’ nika gird bîya û zewecîyaya û torinê ma virazîyayê. La nêbî îmkan ke mêrdeyê mi Maksut înan bivîno. Ma di tim taqîpkar bibê û fek cigêrayîşê edaletî ra nêverdê.”