Oznûr Deger

 

MELETÎ - Kiymet Cengîza ke erdlerzê 6ê Sibate ra nata bi tut û mêrdeyê xo reyde xeyme de ciwîyena, nêeşkena bikewa keyeyê xo yo ke ‘xisaro kêm’ dîyo. Kiymete seba konteynirî muracaatê AFADî kerda û vera raporê astengdarîye waştişê aye ame redkerdiş. 

 

6ê Sibate de merkezê ci Mereş de erdlerz pê ame û tesîrê xo serê 11 bajaran de kerd. Serê erdlerzî ra serrêke derbaz bî la hema zî rêçê erdlerzî xeylê bajaran de est o. Nê bajarê ke tewr zêde zirar dîyî ra yew zî Meletî bî. Kişta vînîbîyayîşanê cidî û rijnayîşan de xebatê xirban hema zî dewam keno. 

 

Serrêke yo xeyme de ciwîyena 

 

Bi deshezaran kesê ke keyeyê înan rijîya, yan zî xisarêk giran dîyî, konteyniran de ameyî cakerdiş û tay zî mecbur mendî ke awanîyê xo yê kêm xisarin de ca bibê. Dewa Pirpirim ya qezaya Çirmikî ya Meletî de cinîya bi nameyê Kiymet Cengîze (44) dimayê erdlerzî xeymeyê verê keyeyê xo yê kêm xesarin de bi tutê xo yê 10 serrî û mêrdeyê xo reyde ciwîyena.

 

‘Ma merdî la reyna wiriştî’ 

 

Kiymete eşkera kerd ke çimanê xo ra probleman ciwîyena, vera raporê aye yê astengdarîye est o zî no yew serrî yo ke bê konteynir a û wina vat: “Ma muracatê AFADî kerd la heme muracatê ma ameyî redkerdiş. Ez nêeşkena bikeewa keyeyê xo yê ke kêm xisar dîyo. Yewine waştişê mi konteynir o. Erdlerz ra nata ma na xeyme de ciwîyenê. Ma tersan vera nêeşkenê bikewê keyeyê xo. Ma xeylê merdimanê xo vînî kerd. Birayê mi, cinîya birayê mi û di tutê înan merdî. Roja erdlerzî de ez aya bîya. Ma tena qîrayêne. Ma Semsûr de merdimanê xo vînî kerd. Ma tîya de merdî û reyna weriştî payan ser. No dej qet nîno vîrîkerdiş. Ez şina kam ci keye eynî çî verê çimanê mi de ganî beno. Birayê mi keweno hewnanê mi. Ma bi ters rakewenê.” 

 

Vera raporê astengdarîye konteynir nêdîyeno 

 

Kiymete qalê nêweşîyanê xo kerd û vat ke erdlerzî ra pey aye de xeylê nêweşî peyda bîyî, nêweşîyê şekir û helîyayîşê esteyan aye de est ê. Kiymete wina peynî ard: “Sere de seba werd ez seba xeylê lazimîyan mecbur manena dekewa zerreyê keye. Ma bi ters şinê û yenê. Wexto ke beno şew zî semedo ke çimê mi nêvînenê ez tersena. Ma xeyme zî bi zorî girewt. Gelo bi nê tersî ez do heta key biciwîya? Çend roj verê cû reyna erdlerz virazîya. Ma tîya de rezîlîyêk gird ciwîyenê. Kes vengê ma nêeşnaweno. Ma keya rê vat, la o zî vat nêvejîyeno. Ma muracatê AFADî kerd. Vera raporê mi yê astengdarîye ame redkerdiş. Wexto ke varan vareno ma binê awe de manenê. Ez tutê xo xeyme de pawena.”