Melîke Aydin

 

MUGLA - Însîyatîfê Welatijan ra Zeynep Akinci da zanayîş ke ê meclîsê ke camêrdan ra awan benê nêwazenê û vat, do cinî cîyayêk pîl awan bikerê. Zeynebe wina vat: “Cinîyê bi hêz û bi tecrube est ê. Çira hende înan ra tersenê.” 

 

Weçînayîşê herêmî nêzdî benê û cinî wazenê hîn zêde şaredariyan de ca bigîrê. Însiyatîfê Welatijan ra Zeynep Akinci da zanayîş ke îdarekarîyê herêmî de projeyê ke cuya cinî û tutan asan kenê muhîm o û vat: “Ganî sere de cinî vatişê namzetan taqîb bikerê û dima ra zî ser de vinderê ke waştişê înan bi ca yenê yan nê. Cinîyê bi hêz û bi tecrube est ê. Çira wina înan ra tersenê? Çira bi înan reyde nêkewenê paştdayîşî. Ganî no bivuryo.”

 

'Ma meclisê ke camêrdan ra awan benê nêwazenê’ 

 

Zeynebe wina dewam kerd: “Ma meclîsê ke camêrdan ra awan benê nêwazenê. Camêrdî babetê cinîyan hîna baş zanê, heta vejîyenê televîzyonan rayîr dane vernîya ma. La vera rêxistinê cinîyan aktîfî zî camêrd înan nêvînenê. No çî merdiman aciz keno. Bodrum û heme rayîrberîyê herêmî de ganî cuya cinîyan bêra asankerdiş. Numune ganî neqlkerdiş bêro asankerdiş. Ganî cinî meclîsê cinîyan de ca bigîrê. Seba ke cinî bieşkê şêrê kare xo ganî kreş bibê. Ganî stargehê cinîyan bibê, ganî keyeyê kal û pîran bibê. Nê heme waştişê ma yê. Seba hûmara keyayê cinî yê Bodrumî zêde bibê ma xebetîyenê. Ma perwerde danî cinîyan. Ma hedef kenê ke peymeyê keyayê cinî se ra 2 bivejnê se ra 10î. Ganî seba ciwan û tutan proje bêrê kerdiş. Ganî hamnan de seba tutan bername bêrê amadekerdiş. Tutî hamnan de şinê kursê Kuranî. Ma nêvanê wa nêşêrê dînê xo nêmusê. Ganî çîyê bîn zî tutî bimusê. Wa şêrê kursê tîyatro, fotograf, spor, futbol, asnawî û sewbînayan.”

 

'Ganî hemwelatijî pey waştişanê xo de bê’ 

 

Zeynebe qiseykerdişê xo yê peyênan de bale ant serê vayeya neqlkerdişî û wina peynî kerd: “Ganî selahîyetdarî nê problemî çareser bikerê. Ganî ma wayîrê hişmendî bê. Ganî şaredarî kişta şarî de ca bigîrê. Ganî dezgehê komelê sivîl bîyaro têkişt û hêzê xo nîşan bido. Ganî şar zî vatişê xo bivajo. Kesê ke kişta şarî de ca nêgînê bi kam ci rîyî benê namzet. Ma bi sozê înan ra bawer nêkenê. Namzetê cinî do şaredarîyan de cîyayeyêk gird awan bikerê. Ganî sozê ke yenê dayîş dima ra bêrê taqîpkerdiş.”