Oznûr Deger

 

MELETÎ - Esnaf Sevîl Dîrîcana ke erdlerzî de dikanê aye xerepîya bî û serrêke yo semedê dikanê xo têkoşîn kena, wina vat: “Ma CÎMERî rê nuşt. AKP ma nêgêra. Bi tewrbîyayîşê Mehmet Ozhasekî Sûka Bakircilarî de merasîmê eştişê temelî pê ame. Dima ke temel ame eştiş xebat dîyayî vindarnayîş.” 

 

Her çend ke yew serrî serê erdlerzê 6ê Sibata 2023yî ke merkeze ci Mereşî bî ra derbaz bibo zî hema tesîrê erdlerzî dewam keno. Yew bajarê ke tewr zêde tesîr bî Meletî bî. Goreyê dayeyê fermî hezar û 237 kesî uca de dinyaya xo bedelnayî û 6 hezar û 444 kes zî birîndar bî. 35 hezar û 891 awanî zî bi hawayêkê giran xisar dî. Xeylê awanî û kargehî zî rijîya. 

 

Dikanê esnaf Sevîl Dîrîcane ya ke taxa yenî Hamamî ya serê Kocana Cezmî Kartayî bî zî rijîya. Sevîle dîyar kerd ke dikan do erdlerzêk diyîn de birijîyo û dîyar kena ke no yew serrî yo tu netîce nêgirewtî. 

 

‘Ma muracatê her ca kerd’ 

 

Sevîle dîyar kerd ke dimayê erdlezî ameya sûke û wina vat: “Xeylê kesî binê xirban de merdî. Serê cenazeyan de dizdî ame kerdiş. erdlerzê diyîn de ez qatê cor ê dikanî de roniştêne. Bi şoqe erdlerzî mi xo eşt war. Xeylê dikanî rijîyayî. Vera hende tehrîbatî şarî rê xizmet nêame kerdiş. ma muracatê her ca kerd. Ma şîyî kişta Walî, kişta şaredarî, kişta parlementere Oznur Çalike. Keya vat do dewlete 6 aşman de dikan teslîm bikera. La bi aşman o ma tîya de yê. Ma muracatê her ca kerd. La çîyêk raşte de çin o.” 

 

CÎMER rê nuşt AKP cewab nêda 

 

Sevîle da zanayîş ke seba dikanî CÎMERî rê nuşta û wina dewam kerd: “La AKP cewab nêda. Ma netîceyêk baş nêgirewt. 11 aşmî yo konteynir nêdîyayo ma. Dimayê 11 aşman mi sûka Misirî de dikan kira kerd, konteynir dayî mi. No nizdîyê yew serrî yo ez dikanê xo de ya. Ez seba keda xo hîsin a. Gelo dewlete rehet a. Ez bi xo rehet nîya. Vewre vara, ma bi tersê do erdlerz bibo ciwîyenê. Ma tu netîceyêk pozîtîf nêgirewt. Dikanê mi tapukerde bî. Coka ra ma nêşinê tu cayêk. Ma rê vatî ‘bi dewlete bawer bikerê do dikanê şima virazo û bido’. La nika vanê do bi peşkî dikan bidîyê.”

 

‘Temelo sexte eştî’ 

 

Sevîle qiseykerdişê xo yê peyênan de bale ant serê temelo sexte ke bi merasîmêk Sûka Bakircilarî de ame eştiş û wina qiseykerdişê xo peynî kerd: “La no temel sexte bî. Mehmet Ozhasekî tewrê merasîmî bî. Hîrê roje dimayê eştişê temelî, heme xebatî dîyayî vindarnayîş. No 11 aşmî yo ma projeyê dikanê xo nêdîyo. Pawitoxê şaredarî Selahattîn Gurkanî ma tehdîd kerd. Mi ci kam ca de bidîyayêne mi dikanê xo persayêne. Rojêke mi rayîr de dî. Mi reyna pers kerd. Ez hêrs bîya mi vat ez do dikanê xo viraza. Mi rê vat ‘ti cahil a’. Dima ra pawitoxê şaredarî pîyê mi rê vatî ‘kênaya to çapemenîye de zaf yena dîyîş wa nêra dîyîş’. Ez heqanê xo gêrena. Yewine waştişê ma bi lezik viraştişê dikanê ma yo.”