Pelşîn Çetînkaya-Gulîstan Gulmuş

 

AMED - Endama Komîsyonê Bawerî û Şaran a DEM Partîye Hatîce Şekere da zanayîş ke kapîtalîzm ercê komelî û dînî hedef girewto, cinî kerdo meta û vat ke serewedarnayîşê ‘jin jiyan azadî’ yê vera nê ke aver kewto muhîm o.

 

Sîstemê camêrd-dewlete wexto ke modelê komelê xo awan keno, cinî, kultur û bawerîyan hedef gêno. Serê dînî ra hêrişê nasnameyê cinîyan keno û no hêriş Rojhelatê Mîyanênî de bi hawayêkê şîdetin dewam keno. Endama Komîsyonê Bawerî û Şaran a Partîya Têduştîye û Demokrasîyî (DEM Partî) Hatîce Şekere da zanayîş ke kapîtalîzm semedê xo dewam bikero, muracatê dînî dano û polîtîkayê derheqê cinîyan yê kapîtalîzmî ke serê dînî ra yenê rayîr ra berdiş zî ercnaye.

 

‘Kapîtalîzm komelî ercanê xo ra dûrî fîneno’ 

 

Hatîce dîyar kerd ke kapîtalîzm ercê komelî hedef gêno û no erc serê komelan ra açarîyeno kelepulê tedaye. Hatîceye wina dewam kerd: “Ma derheqê na nuqta de nimuneyêk bidê. Jîna Emînî semedo ke porê aye asayêne bi hawayêkê hovane ameye qetilkerdiş. Dimayê ke Jînaye dinyaya xo bedelnaye Îran de bi serkêşîya cinîyan şar sere wedarit. Sloganê ‘jin jiyan azadî’ heme dinya açarîya vatişêk polîtîk û eynî wextî de reaksîyon vera zîhnîyetê tedawerîya dînî zî ame mojnayîş.” 

 

Binê nameyê dînî de hêriş 

 

Hatîce dewamê qiseykerdişê xo de ard ziwan ke serê cinîyanê serepişteyan de kategorîzekerdişêk yeno kerdiş û na rewşe wina ercnaye: “Ez nika kesêk sere pişte ya. Wexto ke ez ameya destbendkerdiş nezaret de sereye mi akerdî, porê mi akerde verdayî. Ez nezaretxane de wina menda. Ewro sîstem xo serê bawerîye ra dayo qebulkerdiş. La ma vanê ke no qetî ke eleqeya ci bi bawerîye reyde çin o. Sîstemo bîyaye dîn şuxilneno. Kapîtalîzm sey her raşteyî, raşteyê bawerî de zî tesîrêk keno. Kapîtalîzm semedo ke zano bawerî tesîr bi komelî keno, serê bawerî û dînan de înan şekil keno. Bawerî komelê ma de cayêk gird girewta. Serê na raştîye zî kapîtalîzm komelî binpay keno, pelçiqneno.” 

 

Bi sloganê ‘jin jiyan azadî’ têkoşîn 

 

Hatîce qiseykerdişê xo yê peyênan de vat: “Bi kapîtalîzmî reyde cinî sey obje, sey meta ameya dîyîş. Heta fînîyaya. Sîstem bi no hawa cinîyan xobîyayîşî ra dûrî fîneno û ano peymeyê kelepulêk. Vera heme hêrişan do têkoşînê ma dewam bikero. Ma vanê ‘jin jiyan azadî’. Ma xîret kenê ke sloganî tena sey teorîk û pratîk nêverdê, ma xîret kenê ke nê sloganî heme raşteyan, xebatan de pratîk bikerê.”