MERKEZÊ XEBERAN - Çalakîya grevê vêşanîye ke tepişteyanê sîyasî bi waştişê “Abdullah Ocalanî rê azadî, problemê kurd rê çareserîya sîyasî” dabî destpêkerdiş 77 rojî yo dewam kena. 

 

9ê Teşrîna Verêne 1998ine de hemverê Rayberê PKKyî Abdullah Ocalanî de komploya mîyanneteweyî dest pêkerd û 15ê Sibata 1999ine de teslîmê Tirkîya ame kerdiş. Rayberê PKKyî a roje ra Îmraliyî de binê tecrîdê giran de yeno tepiştiş. 35 aşmî yo tu xebere ci ra nîna girewtiş.

 

Hemverê tecrîdî û semedê azadîya Abdullah Ocalanî 10ê Teşrîna Verêne de 74 merkezê dinya de bi sloganê "Abdullah Ocalanî rê azadî, problemê kurdî rê çareserîyê sîyasî" hemleyêk ame destpêkerdiş. 

 

27ê teşrîna peyêne de zîndananê Kurdistan û Tirkîya de grevê vêşanîye bi eynî sloganî ame destpêkerdiş, roja 77ine de dewam kena. 

 

Bi eynî amancî çalakîya Nobeta Edaletî bi sloganê “Semedê edaletî ma tecrîd bişikinê, semedê aştî ma bibê vengê zindanan” Wan, Amed, Mêrdîn, Mêrsîn, Edene, Stenbol û Îzmîrî de ame destpêkerdiş.

 

“Rayîr ra şîyayîşê Azadîye” bi eynî waştişî 1ê Sibate de bi di baskan Wan û Qers de bi tewrbîyayîşê 74 kesan dest pêkerd.