Zelal Tunç

 

WAN - Endama Meclîsê Cinîyê Ciwan a DEM Partîye Yekbun Safaliye da zanayîş ke çarçeweya azadîya fîzîkî ya Abdullah Ocalan de kampanyaya ‘Îmraliyî rê 1000 Mektube’ rayîr ra benê û venga paştîdayîşî kerd.  

 

Meclîsê Ciwanan ê Partîya Têduştî û Demokrasîyî (DEM Partî) vera polîtîkayê şerê taybetî de 5ê Tebaxa 2023yî de startê kampanyaya ‘Vera şerê taybet de têkoşînêk bi heybet’ da destpêkerdiş. Çarçeweya kampanyaye de xebatî dewam kenê. Meclîsê Ciwanan ê DEM Partîye yê Wanî çarçeweya nê de kampanyaya ‘Îmraliyî rê 1000 Mektube’ da destpêkerdiş.

 

Endama Meclîsê Cinîyê Ciwan a DEM Partîye Yekbun Safaliye derheqê babete de qisey kerd û da zanayîş ke vera heme tedayan xebatê înan bi eleqeyêk gird dewam keno û vat: “Îqtîdar bi polîtîkayê şerê taybet rejîmê tedaye hemverê ciwanan de kerdo dewre. Seba cinîyan tu heqê azadî, komelî nîno dayîş. Heqê ferz biameyêne dayîş do întîxarê ciwanan hende zêde nêbayêne.” 

 

Ciwanî hedefê îqtîdarî de yê 

 

Yekbune dewamê qiseykerdişê xo de ard ziwan ke îqtîdar ‘modelê ciwanan’ yo ke nêfikirîyeno û cipersayîş nêkeno wazeno û wina vat: “Hedefgirewtişê cinî û ciwanan têkoşînî vera yo. Ciwanî xeylê probleman ciwîyenê. Înan ra yew zî perwerdeyî yo. Wargehan de probleme girdî yenê ciwîyayîş. Dekewtişê asansoran, asansoran de mendiş. Werdê wargehan. Zemê seba neqlkerdişî, probleme ekonomîyî. Ciwanî nê probleman hemeyan ciwîyenê.”

 

‘Cinî hedef de yê’ 

 

Yekbune dewamê qiseyerdişê xo de vat: “Ganî ciwanî ferqê nê polîtîkayan de bê û cipersayîş bikerê. Meclîs 5ê Tebaxê de startê ‘vera şerê taybetî de têkoşînêk bi heybet’ da. Derheqê kampanyayan de ‘çalakîyê nobete’ dewam kenê. Mabenê ciwanan de şuxilnayîşê tîryakî zêde bîyo. Polîtîkayê fuhuş û tîryakî dewre de yo. Bi nê polîtîkayan ciwanan hedef gênê. Tewr zêde zî cinîyê ciwanî hedef girîyenê.” 

 

Semedê xebata 8ê Adare û weçînayîşî veng 

 

Yekbune ard ziwan ke polîtîkayê şerê taybetî girêdayeyê tecrîdê serê Rayberê PKKyî Abdullah Ocalanî yo û wina venga ciwanan kerd: “Ma sey Meclîsê Cinîyê Ciwan ê DEM Partîye veng bi heme cinîyan kenê ke derheqê xebatê 8ê Adar û weçînayîşê herêmî de binê vengê DEM Partîye de têkoşîn bikerê.” 

 

‘Ganî ciwanî serê kampanyaye de vinderê’ 

 

Yekbune tewr peynî derheqê kampanyaya ‘Îmraliyî rê 1000 Mektube’ de qisey kerd û vat: “Ganî ciwanî giranî bidê kampanyaye. Heta tecrîdê serê Birêz Ocalanî nêro şikitiş azadî do nêra Kurdistan. Yewine akerdişê rayîrê azadîye Birêz Ocalan o. Amancê ma no yo ke tewr tay hezar mektube bêrê şirawitiş. Ganî ciwan bikewê têgêrayîş mîyan. Ciwanî eşkenê polîtîkayê tecrîdî bişiknê. Ciwanî çend bêveng bibê do teda hende zêde biba. Ganî kes na rewşe qebul nêkero.”