Dîlan Babat

 

ANQARA - Sîyasetmedare Elîf Akgul Ateşe komployê hemverê Rayberê PKKyî Abdullah Ocalanî ercnaye û vat: “Hêzê hegemonîkî paradîgmaya komelkî ya demokratîke ya ke Abdullah Ocalan aver berde, tehluke vînenê. Projeyo ke Rojawan de kewto cuye, hesabê hêzê emperyalîstan nîno. Vera atmosferê tarî yê Rojhelatê Mîyanênî de meşaleya azadîye gûr bena.” 

 

9ê Teşrîna Verêne ya 1998î de hemverê Rayberê PKKyî Abdullah Ocalanî de bi tewrbîyayîşê hêzê mîyannteweyî, komployê mîyanneteweyî dest pêkerd û 15ê Sibata 1999î de Ocalan teslîmê Tirkîya ame kerdiş. teslîmkerdişê Ocalanî ra nata 25 serrî derbaz bî. Rayberê PKKyî roja ameyo teslîmkerdiş ra nata Îmraliyî de binê tecrîdê giran de yo û Abdullah Ocalan Îmraliyî de paradîgmaya modernîteya demokratîke aver berd. Paradîgma her tim hetê hêzê ke tewrê komployî bîyî ra ame hedefgirewtiş û tecrîd coka ra ame girankerdiş. 

 

Sîyasetmedare Elîf Akgul Ateşe komployê mîyanneteweyî yê vera Rayberê PKKyî Abdullah Ocalanî û tesîro ke serê sîyasetî de kerdo, ercnaye. 

 

‘Birêz Ocalan paradîgmayêk newe aver vist’ 

 

Elîfe destpêkerdişê qiseykerdişê xo de komplo şermezar kerd û dîyar kerd ke komplo şexsê Rayberê PKKyî de hemverê îrade û hêvîya kurdan de ameyo kerdiş. Elîfe wina dewam kerd: “Komplo vera şaran de bî. Komplo her çar parçeyê Kurdistanî hewênayêne. Komplo vera îradeya xoverdayîşî de bî. Hêzê komploger bi komployî verê xo dayî çar parçeyê Kurdistanî. Rayberê şarê kurdî Abdullah Ocalan, wayîrê mîsyonêk muhîm bî û coka ra bî hedefê komplogeran. Birêz Ocalan seba azadîya şarê kurdî paradîgmayêk newe aver vist.” 

 

‘Xeta azadîya kurdî hedef ame girewtiş’ 

 

Elîfe dewamê qiseykerdişê xo de wina vat: “Abdullah Ocalan îdeolojîyêke newe awan kerd. Na îdeolojî her çar parçeyê Kurdistanî de rêxistinbîyayîş xo reyde ard. Heme hetê bindestî yê komelî yê her çar parçeyê Kurdistanî vist têgêrayîş. Elewîyê ke tarîxê komare de ameyî înkarkerdiş zî cayê xo mîyanê nê pelî de girewtî. Bawerîyê ke ameyî înkarkerdiş nê prosesî de cayê xo girewtî. Xurtbîyayîşê têgêrayîşê kurdî demêk kilm de welatê Ewropa vist mîyanê fikaran. Gladyoyê NATO, DYAye vera nê furyayî de hêrişî dayî destpêkerdiş. Şexsê Rayberê Şarê Kurdî de xeta azadîya kurdî hedef ame girewtiş. Hemverê Birêz Ocalanî de polîtîkaya îmhaye vistî dewre.”

 

‘Planê DYA û Yewnanîstanî cîya yê’ 

 

Elîfe eşkera kerd ke welatê ke tewrê komployî bîyî hemverê lîderê PKKyî de ‘neçîr’ dayî destpêkerdiş û wina dewam kerd: “DYA û Yewnanîstan seba ke Tirkîya qels biba bê hêz bimana, şerêk mîyanneteweyî Tirkîya de pê bêro kewtî mîyanê xîretkerdişî. Teslîmkerdişê Birêz Ocalanî yê seba Tirkîya zî netîceyê nê polîtîkayan de bî. Yewnanîstan seba problemê Ege û Kibrisî bêro çareserkerdiş, xîretkerdişêk pîlî mîyan de bî. Xîret kerdêne bi şerêk ke Tirkîya de bêro vejîyayîş tirkî û kurdî bêrê hemverê yewbînan. Vera nê de zî do Tirkîya bi şaranê xo reyde bêra vera yewbînan. Do kaos pê biameyêne. La no komplo hetê Birêz Ocalanî ra veng ame vetiş. Abdullah Ocalan bi perspektîfê ‘yewîya şaran’ kayê Yewnanîstan û DYAye veng vet.” 

 

‘Pêrodayîş bi paradîgmaya Birêz Ocalanî eşkenê çareser bibo’ 

 

Elîfe qiseykerdişê xo yê peyênan de vat ke pêrodayîşê mabenê Îsraîl û Fîlîstînî zî xo paweno polîtîkayê înkar û îmhayî û vat: “Hamas Îsraîlî ra cîya nîyo. Hamas hêrişê hemverê Îsraîlî de bi seyan kesî qetil kerd. ewro welatê NATO vanê ke no hêriş qirkerdiş o. La hêrişê hemverê Rojawanî nêvînenê. Nê şerî de heto ke vînî keno şar o. Tezê Birêz Ocalan reyna serkewt. Pêrodayîşo ke Îsraîl de yeno ciwîyayîş, bi paradîgmaya komelêk azad ê cinîye yê modernîteya demokratîke ya Birêz Ocalanî eşkeno bêro çareserkerdiş. Paradîgmaya birêz Ocalanî yê seba Rojawanî, Rojawan de pê yeno. Pêrodayîşê Sûrîyeye bi paradîgmaye eşkenê bêrê çareserkerdiş. Hêzê hegemonîkî paradîgmaya komelê demokratîke yo ke Abdullah Ocalanî vist aver, tehluke vînenê. Projeyo Rojawan de kewto cuye hesabê hêzê emperyalîstan nîno. Vera atmosferê tarî yê Rojhelatê Mîyanênî de meşaleya azadîye gûr bena. Azadîya Birêz Ocalanî azadîya şarê kurdî ya. Şarê kurdî ewro bi hêvîyêke pîl kampanyayê semedê azadîye de ca gênê.”