Zelal Tunç

 

WAN - Endama Heyetê Rayîrber a ÎHDyî Ayten Kirane seba grevê vêşanîye, Nobetê Edaletî û Rayîr ra Şîyayîşê Pîl ê Azadîye dîyar kerd ke gamê muhîm ê û vat ke şar her ca de parlementerê ke çalakî rayîr ra berdî bi hêvîyêke pîl pêşwazî kerd. Aytene da zanayîş ke ganî aktorê sîyasî proses baş biercnê û venga peynîkerdişê tecrîdî kerd. 

 

Çarçeweya kampanyaya ‘Abdullah Ocalanî rê azadî, problemê kurdî rê çareserîya sîyasî’ 27ê Teşrîna Peyêne de zîndanê Kurdistan û Tirkîya de grevê vêşanîye bi eynî sloganî dîyayî destpêkerdiş û roja 82ine de dewam keno. Bi eynî waştişan bi serkêşîya merdime tepişteyan çalakîya "Nobeda Edaletî" dîya destpêkerdiş. Sewbîna 1ê Sibate de zî "Rayîr ra Şîyayîşê Pîl ê Azadîye" Qers û Wan de rayîr ra şîyayîş dîya destpêkerdiş. Endama Heyetê Rayîrber a Komeleya Heqanê Merdiman (ÎHD) Ayten Kirane derheqê waştişê çalakîyan de ajansê ma rê qisey kerd.

 

‘Tecrîd bi xoverdayîşê tepişteyan veng vejîya’ 

 

Aytene da zanayîş ke binpaykerdişê heqan ê zîndanan her ke şino zêde beno û îqtîdar ge-ge goreyê rewşe şîdet keno. Aytene wina vat: “5 serrê peyênan de binpaykerdişê heqan zêde bî. Tecrîdê Îmraliyî tesîrêk gird serê heme zîndanan de kerdo. No tecrîd bi zîndanê neweyan ke virazîyayî resayo merheleyêk cor. Tecrîdê serê tepişteyan her ke şino giran beno. A ra heta Zyî tîpê zîndanan awan kerdî. Ge-ge babeta tecrîdî de ser kewtî la tepişteyan zaf reyan tecrîdî veng vet.”

 

‘Ganî îqtîdar bi hawayêkê cidî bifikrîyo’ 

 

Aytene qiseykerdişê xo wina dewam kerd: “Semedê tecrîdî, semedê Abdullah Ocalanî grevê vêşanîye zîndanan de dîyayî destpêkerdiş. Tecrîd sûcê merdimîye yo. Zîndanan de şert û mercê cuye zaf giran ê û bi grevan probleme weşîye vejîyenê raşte. Tepişte vanê heta 15ê Sibate tecrîd nêwirzo do grevê xo dewam bikerê. Ma demê verênan ra zanê ke grev beno sebebê travmayê pîl. Ganî îqtîdar nê çîyî baş verê çiman de bigêro.”

 

‘Ganî pêvînayîş bêrê kerdiş’ 

 

Aytene dîyar kerd ke nê welatî de sey kurdî çin ê, seke tepişteyê sîyasî çinî bê têgêrenê û wina dewam kerd: “Îqtîdar zano ke no problem çend pîl o. Ganî bi lezkî tecrîd peynî bibo. Ganî pêvînayîş bêro kerdiş. Tecrîd heme zîndanan de vila bîyo. Bi taybetî serê tepişteyanê cinîyan de tecrîd û binpaykerdişê heqan ê pîl est o. Ganî tepişteyê nêweşî serbest bêrê verdayîş. Muhlîse Karaguzel û Hanîfe Aslane vera nêweşîyê giran û emre xo yê pîl de serbest nînê verdayîş. ATK her reye raporê cîyayan dano û raporê ‘eşkena tepişte bimana’ dano. Îqtîdar tepişteyanê sîyasî serbest nêverdeno, seba Hîzbûllahî efuyê taybetan vejeno.” 

 

Cotstandardî dewre de yo 

 

Aytene sewbîna dîyar kerd ke tena zîndanan de nê hemverê çalakîyê teberi de zî cotstandardî dewre de yo û wina dewam kerd: “Ma sey komeleya heqanê merdiman bajaranê xo de sey çimdaran tewrê çalakî û bernameyan benê. Ma ewnîyenê eynî roje de çalakîya ke têgêrayîşê kurdî kena, sendîkayê hetgirê îqtîdarî zî keno. La nizdîbîyayîşê hêzê asayîşî zaf cîya yo. Di nizdîbîyayîş vejîyeno raşte. Welatê ke problem bibo de ganî hukmat seba çareserîya xîret bikero. Îqtîdar mecburo nê çareser bikero.”

 

‘Ganî no îmkan baş bêro ercnayîş’ 

 

Aytene bale ant serê grevan, Nobetê Edaletî û rayîr ra şîyayîşê pîl ê azadîye û wina qiseykerdişê xo peynî kerd: “Seba şikitişê tecrîdî û çareserîya problemê kurdî nê aktîvîteyî ameyî destpêkerdiş. No seba AKPyî dayeyêk muhîm o. Ganî îqtîdar nê esas bigêro û çareser bikero. Sey pawitoxê heqan çimdarîyê ma est ê. Dimayê rayîr ra şîyayîşî ganî proses bêro ercnayîş. No îmkanêk baş o. Ganî no îmkan baş bêro ercnayîş.”