MERKEZÊ XEBERAN - Pispora Cerahîya Pêroyî Doç Dr. Ebru Ayvazoglu Soye da zanayîş ke Tirkîya de kanserê çiceyan heta emrê 40î kewto û heme cinîyê serê emrê 20î binê rîskê kanserê çiceyan de yê. 

 

Dinya de yew serrî de mîlyonêk teşhîsê nêweşîya kanserê çiceyan yeno kerdiş. înan ra 400 hezar nêweşîye vera dinyaya xo bedelnenê. Teşhîsê lez cuye xelisneno. Pispora Cerahîya Pêroyî ya Nêweşxaneyê Bayindir Kavaklideren û nêweşxaneyê Bayindir Sogutozuyî Doç Dr. Ebru Ayvazoglu Soye derheqê kanserê çiceyan û dermankerdişê ci de malumatan da. 

 

Ebruye dîyar kerd ke kanserê çiceyan yew tewirê tewro ke zêde yeno dîyîş o û wina vat: “Bi taybetî serê emrê 50-60î de zêde yeno dîyîş. La tirkîya de heta emre 40î kewto û her cinîyan ke serê emrê 20î de ya binê rîskî de ya.” 

 

Menepozê erê rîsk zêde keno 

 

Ebruye wina eşkera kerd: “Keye de hîkayeya kanserê çiceyan risk zêde keno. Keye de bîyayîşê kanserê rahîm, dermankerdişê işinî yê herêma çiceyî de, reglo lez, erê kewtişê menepozî rîskê kanserê çiceyan zêde keno. Yew faktorê tewr zêde bi tesîrê hormono cinîbîyayîşî yo rê ma vanê ostrojen. Vilabîyayîşê ostrojen û progestanî, ge-ge beno sebebê vilabîyayîşê înan hormonan û kêmbîyayîşê ostrojen û progestanî. No rîsk zêde keno. Erêkewtişê menepozî zî rîskê kanserî zêde keno. Goreyê cigêrayîşê ke ameyî kerdiş cinîyê ke verê emrê 12î regl dîyî de goreyê cinîyanê bînan hîna zêde binê rîskî de yê.”

 

Ebruye wina dewam kerd: “Eke demêk derg dermanê hormonan bêro kerdiş zî no rîskê kanserî zêde keno. Yew faktorê muhîm hîkayeyê merdimi yo. Eke verê cû lezyon bêrê dîyîş no rîsk zêde keno. Cinîya ke hîs bikera kîtle çiceyê aye de est a ganî bi lezkî şêra doktor. Her kîtle kîtleyê kanserî zî nîyo. Na babetêka cidî ya. Ganî bi lezkî merdim muracatê doktorêk bikero.” 

 

Teşhîsê lez muhîm o 

 

Ebruye qiseykerdişê xo wina dewam kerd: “Seba dermankerdişê kanserê çiceyan bi tesirin bibo teşhîsê lez muhîm o. Dimayê 40 serrî ganî heme cinî timî kontrolanê xo bikerê. Ganî her serre mamografi biancê. Eke mamografi û oltrason mird nêkero ganî MR yê çiceyî bêro antiş. Dima yê emrê 20î ganî her cinî şêra kontrol.” 

 

Ebruye qiseykerdişê xo yê peyênan de qala raybazê dermankerdişê kanserê çiceyî kerd wina peynî kerd: “Ganî onkologê medikal û pisporê cerahîya pêroyî raybazê dermankerdişê çiceyan bikerê. Cerahîya kanserê çiceyan de raybazê ‘mastektomî’ yeno şuxilnayîş. Mastektomîye de çerm, tumurê çiceyan bi amelîyatî yeno girewtiş. Roja ewro de raybazê cerahîyê pawitişê çiceyan yeno tercîhkerdiş. No zî çarçeweya prensîbê cerahî û onkolojîk de yeno kerdiş.”