Şehrîban Aslan 

 

AMED - Serra verêne şikdar Abdulhamît Altan cinîya bi nameyê Ayşe Altana ke ci reyde merheleya fekverdayîşî de bî, qetil kerd. Îdîanameyo ke derheqê şikdarî de ame amadekerdiş de sucê ‘Plankerde bi qestî cinîye kişto’ ceza ameye waştiş. Sewbîna îdîaname de ame dîyarkerdiş ke şikdar tedaya xokiştişî zî bi Ayşeye kerdo. Coka ra Ayşeye xo nêkişta, o Ayşeye kişto. 

 

16ê êlula 2023yî de Peyasê Amedî de camêrdo bi nameyê Abdulhamît Altanî, cinîya bi nameyê Ayşe Altane (31) ke ci reyde merhelya fekverdayîşî de bî, pê tifingî qetil kerd. Ayşeye hîrê aşme verê ke bêra qetilkerdiş, qerarê fekverdayîşî gêna û şina kişta keyeyê xo de bi ca bena. Şikdar Ayşe remneno û beno keye û qetil keno. Şikdar bado ke ame destbendkerdiş hetê 3ine Mehkemaya Cezaya Sulhî ya Amedî ra ame tepiştiş. 

 

Serdozgerîya Komare ya Amedî derheqê şikdarî de sucê ‘Plankerde bi qestî cinîye kişto’ ra îdîaname amade kerd. 

 

Ayşeye hetê şikdarî ra bi plankerde ameye qetilkerdiş  

 

Îdîaname de ame dîyarkerdiş ke 16ê êlula 2023yî de saete dormeyê 07.28î de îxbar yeno polîsan rê û îxbar de 4 tutê şenikî gêrayî û vatî ke dadî û pîyê înan merdî, la polîsê ke şinê keye vînenê ke şikdar keye de nîyo. Îdîaname de yeno dîyîş ke şikdar bi îfadeyê xo pawitiş kerdo û şikdar vato ke bi Ayşe zor kerdo ke xo bikişa la semedo ke aye xo nêkişta, na rey o bi xo Ayşeye qetil kerdo. 

 

Derheqê şikdar de sucê ‘Plankerde bi qestî cinîye kişto’ ra ceza ame waştiş. Îdîanameyo ke ame amadekerdiş, hetê 10ine Mehkemaya Cezaya Girane ya Amedî ra ame qebulkerdiş. Roniştişê dewaye ya yewine 31ê Gulane de yo.