ÊLIH - Namzeta hemşaredarîya Êlihî Gulistan Sonuke projeyê xo yê rayîrberîyê herêmî ke do bikera dewre pare kerd û vat: “Çareserîya heme probleman rayîrberîyê herêmî de yo û ma do xebatan nê esasî de pê bîyarp. Ma do sîyasetî herême de ca bîyarê û problemê herêmî şarî redye çareser bikerê.” 

 

Weçînayîşê herêmî yê 31ê Adare rê demêk kilm mend û xebatê weçînayîşî yê partîyê sîyasî dewam kenê. Namzeta Partîya Têduştîye û Demokrasîyî yê Şaran (DEM Partî) bado ke namzetanê xo dîyar kerd kuçe bi kuçe xebatê xo rayîr ra bena. Namzeta Hemşaredarîya Êlihî Gulistan Sonuke derheqê projeyê xo û weçînayîşan de qisey kerd.

 

 ‘Waştişê şarî zêde yo’ 

 

Gulistane ard ziwan ke yew sebebo ke aye ver bi namzetîye ra berdo, vetişê planê aver ê îradeyê cinîye yo û wina vat: “Verê namzetîya mi xebatê cinîyan mi rayîr ra berdêne. Ma xeylê taxan de bi cinîyan reyde ameyî têhet. Ma kombîyayîşan viraşt. Ma talebê cinîyan ê rayîrberîyê herêmî ra munaqaşa kerd. Ma dî ke rayîrberîyê herêmî ra çareserî pawenê. 1999î ra heta 2016î, serra 2024î ra tepîya ma do serê heme tecrubeyan, tecrubeyê xo awan bikerê. Şar dî ke şaredarî bi ferasetê demokratîke eşkeno bêro rayîr ra berdiş. Coka ra waştişê şarî zêde yê.” 

 

 ‘Xeylê dosyayê ke serê înan ameyî girewtiş est ê’ 

 

Gulistane da zanayîş ke Êlih hedefê polîtîkayê şerê taybetî de yo û wina vat: “Êlih serra 90î de bi qetilkerdişê cinîyan û întîxarî ameyêne rojeve. Rayîrberîyê herêmî de no problem ame çareserkerdiş û Êlih sey ‘bajarê cinîyan’ ame naskerdiş. Bi tayînkerdişê qeyûman reyde xeylê prblem ameyî ciwîyayîş. Heme raşteyê ke cinî muracat kenê, ameyî girewtiş. Cinî bê çareserî ame verdayîş. Mudirê camêrdî tayînê dezgehan kerdî. Cinî her ca de bi zîhnîyetê serdest ê camêrdî reyde ameyî rî bi rî. Îpek Ere dimayê destdergîya Musa Orhanî întîxar kerd. Xeylê dosyayê ke serê înan ameyî girewtiş est ê.” 

 

‘Ma do dezgehanê xo awan bikerê’ 

 

Gulistane ercnayîşê xo de vat: “Çareserîya problemê cinî û ciwanan rayîrberîyê herêmî yo. Ma rewşa ekonomîya cinî û ciwanan zanê. Ma do vera şîdetî de xebatan rayîr ra berê û vera tîryakî ke ciwanî kewenê mîyanê ci de têkoşînê xo dewam bikerê. Nê esasî de ma do dezgehan abikerê. Çareserîya heme probleman rayîrberîyê herêmî de yo. Raşteyê rayîrberîyê herêmî cuye bi xo yê. Ma do sîyasetê herêmî biweçînî, problemê herêmî ca de, bi şarî reyde, bi dezgehê cinîyan reyde çareser bikerê.” 

 

 ‘Na herre ya şarî ya’ 

 

Gulistane bale ant serê hêrişê qeyûman ê vera kultur û ziwanî û vat: “Bajarê ma yê ke ameyî rijnayîş û veşênayîş serê dejê ma de binê nameyê festîvalan de çîyan kenê. Nê heme polîtîkayê şerê taybetî yê. Seba herra Kurdistanî texrîb nêba, bêra pawitiş çi destê ma ra bêro ma do bikerê. Na herre ya şarî ya.”

 

‘Cewabêk xurt do bêro dayîş’ 

 

Gulistane qiseykerdişê xo yê peyênan de seba weçînayîşê herêmî ke do 31ê Adare de pê bêro veng kerd û wina vat: “Vernîya ma de prosesêk est o. Ma 31ê Adare tena sey reqabetê partîyê sîyasî nêercnenê. Ma îradeyê xo ronenê raşte. Ma do cewabêk xurt bidê kesê ke îradeyê şarê kurdî nas nêkenê. Ez venga wayîrvejîyayîşê sindoqan bi heme şarê ma kena û wa xebatê weçînayîşî de ca bigîrê.”