Nazlican Nûjin Yildiz

 

ÎZMÎR - Sekretera Şûbeyê Hûmara 2ien ya Egîtîm Senî ya Îzmîrî Fîlîz Eraslane dîyar kerd ke îqtîdarê AKP-MHPyî zîhnîyetê yewperestî bi projeyê ÇEDESî mekteban de pê ano û vat: “Heme falîyetê ke çarçeweya ÇEDESî de yenê kerdiş suc ê. Ganî vera ÇEDESî de keye û kedkarê perwerdeyî têkoşîn bikerê.” 

 

Protokolê projeyê Ez Seba Dormeyê xo Hîsin a, Wayîrê Ercanê Xo Vejîyena (ÇEDES) ya hetê Wezarîya Perwerde, Serekatîya Karê Dîyanet û Wezarîya Ciwan û Sporî ra bi hawayêkê hempar yeno rayîr ra berdiş, vera heme reaksîyonan pê yeno. Wezarîya Perwerdeyî pêvînayîşê butçeye de vatbî tarîkatî her yew rêxistinê komelê sivîlî û protokolê înan dewam keno. Çarçeweya ÇEDESî de mekteb û cayê teberê mekteban de caardiş destpêkerd. Qezaya Xîzanî ya Bedlîsî de Mektebê Mîyanên ê Nursî de seba wendekaranê sinifê 7ine bi amancê ‘musnayîşê îbadetê hecî’ maketêk ke Kabeyî temsîl keno sinifan de ame cakerdiş. Wendekarî dormeyê nê maketî de provayê kerraeştişê şeytanî kerd. tebîî qet şik çin o ke bi nê çîyî sînor nêmendî. Bajarê cîya yê Tirkîya de wendekaran benê camîîyan. Şarkişla de wendekarê ke emrê înan 5 serrî yo yê mektebê mîyanênî yê Kenan Tunakanî berdî camîî. Mudirê Perwerde yê Çekmekoyî yê Stenbolî zî wendekaran binê nameyê ‘pîya ver bi asayîşî’ wedarit nimaj. 

 

Sekretera Şûbeyê Hûmara 2ine ya Egîtîm Senî ya Îzmîrî Fîlîz Eraslane derheqê babete de ercnayîş kerd. 

 

Dîyanet festîvale plan keno 

 

Fîlîze vat çîyo ke wezîrîya perwerdeyî kena nîyetê îdeolojîk ra xoser nîyo û vat: “Ma derheqê ÇEDESî de nîyetêk baş nêvînenê. Proje de problemî est ê. Merkezê ciwanan yê ke girêdayeyê dîyanetî yê est ê û merkezê ciwanan yê wezîrîya sporî zî est a. Nê cayan de se bêro kerdiş vejîyeno raşte. Xora dimayê îmzakerdişê ÇEDESî merkeze înan vejîyayî raşte. Mudirîyetê perwerdeyî yê merkez û qezayan destûr bidê nê bernameyan ê heme bernameyan benê nê cayan. Nê bernameyî çî yê? Bernameyê pakîya camîî û goristanan. Festîvalêke yena plankerdiş, dîyanet plan keno û mîyaneyê nê bernameyan nîno zanayîş.” 

 

Tehlukeyê ‘wayê’ û ‘bira’ 

 

Fîlîze da zanayîş ke bi ÇEDESî reyde mekteban de ‘way’ û ‘bira’ ameyî wezîfedarkerdiş û wina vat: “Kesê ke ameyî wezîfedarkerdiş do goreyê çi nimûne bêrê girewtiş ma nêzanê. Na rewşe ganî bêra cipersayîşkerdiş. Na rewşe bi şikin a. Tehluke ya. Ma verê cu zî wayîtî û biratî dî. Ma aqûbetê tutanê xo yê ke teslîmê înan kerd, dî. Binpaykerdiş virazîyayî. Teda û zor virazîyayî. Ma do tutanê xo teslîmê kesê ke formansyonê înan yê pedagojîk çin o bikerê. Çîyo tewr tehluke zî no yo.” 

 

‘Heme mekteban açarnayî Îmam Hatîban’ 

 

Fîlîze dewamê qiseykerdişê xo de dîyar kerd ke îqtîdarê AKP-MHPyî zîhnîyetê yewperest bi projeyê ÇEDESî mekteban de pê ano û vat: “Bi Îmam Hatîban nê çîyî nêkerdî û bi sînor mend. Bi ser nêkewt. Her ca de Îmam Hatîpan akerdî. Her mekteban açarnayî Îmam Hatîban. Nika bi protokolêk wina ameyî. Îzmîr de seba 842 mektebî mele ameyî tayînkerdiş. ÇEDES vera raybazê laîkbîyayîşî de yo. ÇEDES vera destura bingeyîn û Qanûnê Esas ê Perwerdeyîyê Neteweyî de yo. Bi nê projeyeyî wendekarê bawerîyê cîya do xo cîya bivînê û hîs bikerê. Amancê AKP-MHPyî no yo ke îdeolojîyê xo serê yew dîn, yew nîjad, yew mezheb, yew netewî de rayîr ra bibo. Wezîrîya Perwerdeyî bi wesîleya tarîkatan bî wezîr. Nê çîyî bi fekê xo vat.” 

 

‘Ganî ma têkoşîn bikerê’ 

 

Fîlîze da zanayîş ke xeylê bajaran de platformî ameyî awankerdiş û Îzmîr de zî ameyo awankerdiş û wina qiseykerdişê xo peynî kerd: “Çend sendîka, komele, rêxistinî est ê. La mird nêkeno. Ganî rêxistinî hîna pîl biba. Vîşêrê rêxistinbîyayîşî tu raybazêk çin o. Heme falîyetê ke çarçeweya ÇEDESî de yenê kerdiş, suc ê. Ganî vera ÇEDESî de keye û kedkarê perwerdeyî têkoşîn bikerê.”