Marta Somek

 

STENBOL - Parlamentera DEM Partîye ya Stenbolî Çîçek Otluye derheqê Mîtîngê Azadî û Demokrasîyî ya ke do 25ê Sibate de Raşteyê Esenyurtî de pê bîyarê venga tewrbîyayîşî kerd û vat: “Ameyîşê têhet ê şaranê Tirkîya, yeno manaya ardişê ziwan ê çareserîya problemê kurdî û wedaritişê tecrîdî ê serê Birêz Abdullah Ocalanî. Coka ra ganî heme şarê Tirkîya, kedkar û karkerî 25ê Sibate de Esenyurt de bê.” 

 

Tecrîdê girankerde yê serê Rayberê PKKyî Abdullah Ocalanî 26 serrî yo dewam keno û 35 aşmî yo tu xeberêke ci ra nîna girewtiş. Bi waştişê azadîya fîzîkî ya Abdullah Ocalanî û çareserîya problemê kurdî û Kurdistanî, Tirkîya û dinya de çalakî dewam kenê. Çarçeweya kampanyaya “Abdullah Ocalanî rê azadî, problemê kurdî rê çareserîya sîyasî” de semedê peynîkerdişê tecrîdî û semedê azadîya fîzîkî ya Abdullah Ocalanî nobetê edaletê, grevê vêşanîye ke destpêkerdbî, dewam kenê. 

 

Sewbîna mabenê 1-15ê Sibate de çalakîya "Rayîr ra Şîyayîşê Pîl ê Azadîye" pê di baskan Wan û Qersî de dîyabî destpêkerdiş. Rayîr ra şîyayîş 15ê Sibate de Amara de peynî bî. Bi amancê silamkerdişê rayîr ra şîyayîşî DEM Partîye ya Stenbolî do 25ê Sibate de roja yewşeme saet 14.00î de Raşteyê Esenyurtî de ‘Mîtîngê Demokrasî û Azadîye’ pê bîyara. Yeno pawitiş ke bi hezaran kesî tewrê mîtîngî bibê. Bi hewteyano semedê mîtîngî qezayanê Stenbolî de xebate yena rayîr ra berdiş. 

 

Raywana Azadîye û Parlamentera DEM Partîye ya Stenbolî Çîçek Otluye derheqê mîtîngî de JINNEWSî rê qisey kerd.

 

‘Tecrîd bêçareserîya problemî yo’ 

 

Çîçeke da zanayîş ke Rayîr ra Şîyayîşê Pîl ê Azadîye pê di baskan Wan û Qersî de destpêkerd û wina vat: “Ma seserra komara dewleta Tirkîya de dî ke zîhnîyetê yewperest senî ameyo ferzkerdiş û bêçareserîya problemê kurdî de israr ameyo kerdiş. Yew polîtîkayê israrkerdişî zî Îmrali yo û uca de tecrîdêk giran yeno rayîr ra berdiş. 35 aşmî yo tu xeberêke Birêz Abdullah Ocalanî ra nîna girewtiş û tecrîd yeno manaya bêçareserîya problemê kurdî. Semedo ke tecrîdê serê Birêz Ocalanî peynî bibo, çareserîya problemê kurdî pê bêro ma rayîr ra şîyayîş da destpêkerdiş.”

 

‘Şar aştîye wazeno’ 

 

Çîçeke dîyar kerd ke temamê rayîr ra şîyayîşî de şîyî zîyaretê xeylê kesan û wina dewam kerd: “Ma şîyî zîyaretê mezelê şehîdanê komelî. Ma kiştişê kerdoxê înan nedîyar reyna ard vîrê xo. Ma tarîxê têkoşînê Kurdistanî gam bi game ard têhet. Belkî rayîr ra şîyayîşê Wan û Qersî bi adirê şenik ameybî destpêkerdiş la nê rayîr ra şîyayîşî de şaran aştî û têduştî waşt. Çareserî eynî wext de waştişê heme şaranê Tirkîya yo. Yê karker û kedkaran o. Coka ra mîtîngê 25ê Sibate muhîm o.” 

 

Seba mîtîngê vengdayîş: Ganî şarê Tirkîya Esenyurt de bo 

 

Çîçeke da zanayîş ke seba çareserîya problemê kurdî ganî tecrîd peynî bibo û wina peynî kerd: “Şikitişê tecrîdî yeno manaya aştî û demokrasî, têduştî, çareserîya problemê kurdî. Ameyîşê têhet ê şaranê Tirkîya, yeno manaya ardişê serê ziwanî yê çareserîya problemê kurdî û wedaritişê tecrîdê serê Birêz Abdullah Ocalanî. Ganî heme şarê Tirkîya, kedkar û karkerî 25ê Sibate de Esenyurt de bê.”