STENBOL- Buroyê Huqûqî yê Asrinî seba ke CPTyî rixmo ke Tirkîya zîyaret kerd, nêşiyo Îmraliyî nêrazîbîyayîş mojna û vat, CPT goreyê ewnîyayîşê dewlete nêzdîyê Îmraliyî beno.

 

Buroyê Huqûqî yê Asrinî derheqê Komîteyê Vernîgirewtişê Îşkenceyî yê Ewropayî (CPT) eşkerayîye da ke amebî serdayîşê zîndananê Tirkîya la nêşîbî serdayîşê miwekîlê înan Rayberê PKKyî Abdullah Ocalan ke Zîndanê Tîpê Fyî yê bi Asayîşê Berzî yê Îmraliyî de yeno tepiştiş û 35 aşmî yo tu agahî ci ra nîna girewtiş. 

 

Buroyê Huqûqî yê Asrinî derheqê zîyaretê peyênî yê Komîteya Vergirewtişê Îşkenceyî (CPT) yê Tirkîya de eşkerayîye daye û nê pare kerdî: ''CPTyî eşkerayîya xo ya vizêrîne de da zanayene ke înan tarîxanê 13-24ê sibata 2024î de Tirkîya de tay zîndanî zîyaret kerdî. Zîndanê ke ameyî zîyaretkerdene mîyanê înan de nameyê Zîndanê Îmraliyî çîn o. Eşkerayîya CPTyî de yeno vateneke înan derheqê rewşa Îmraliyî de zî pêvînayîşî kerdî. 

 

Eşkerayîye ra yeno famkerdene ke heyetê CPTyî Zîndanê Îmraliyî zîyaret nêkerdo Birêz Abdullah Ocalan, Birêz Veysî Aktaş, Birêz Hamili Yildirim û Birêz Omer Konarî reyde pêvînayîş nêkerdo ke mîyanê sîstemê tecrîdê Îmraliyî de yê û 35 aşmî yo înan ra qet xeberêke nîna girewetene. No nizdîbîyayîşê CPTyî goreyê qedexeyê îşkenceyî û vergirewtişê şertanê îşkenceyî nîyo. 

 

No nêzdîbîyayîş nîno qebûlkerdene

 

Muwekîlê ma bi serran o avûkatan û merdimanê xo nêvînenî. Înan ra qet xeberêke nîna girewtene. Bi hewayêkê sîstematîkî bîlasebeb cezayê dîsîplînî yenê dayene. Îmrali de heqê pawitişî bi temamî werte ra ameyo wedaritene. Heyetê CPTyî rixmê şertanê giranan ê tecrîdî û bêhuqûqîya ke yena kerdene têna selahîyetdaran de pêvînayîş kerdo ke no nîno qebulkerdene. 

 

CPT bi xo zano ke Tirkîya qerarê 'Ganî cade avûkatanêxo rede pêvînayîş bikero' yê Komîteya Heqanê Merdiman ê Yewîyanê Neteweyan serrêke û nîm o ke nêerdo ca. Rixmê nê têna selahîyetdaranê dewlete de pêvînayîşkerdiş yeno na mana ke înan rewşa tepişteyan keyfe dewlete rê caverdayo. Na rewşe mojnena ke îşkence û tecrîdî Îmraliyî do dewam bikero. 

 

Pawitişê ma CPTyî ra oyo ke wa tespît û çimdarîya xo yê mraliyî rayapêroyîye rê eşkera bikero. Seba ke pêvînayîşê keyeyî û avûkatan bêrê kerdene û ganî bi çimê dewlete mewenîyo, herinda naye de rolêkê aktîf kay bikero.”