MERKEZÊ XEBERAN - 24 saetan de 8 cinî hetê camêrdan ra ameyî qetilkerdiş. Nê ser de KCDPyî venga çalakîye kerd.

 

Bi nêzdîbîyayîşê 8ê Adare reyde goreyê xeberê ke çapemenîye de ca girewtî, mîyanê 24 saetan de 8 cinî hetê camêrdan ra ameyî qetilkerdiş. Cinîyêke zî bi giranî birindar bî.

 

Qezaya Pamukkaleyê Denîzliyî de cinîya bi nameyê Nasim Gole ya afganîstanije hetê camêrdê ke ey reyde zewicnaye bî bi nameyê Muhammet Esmail Habibî ra bi kardî ameye qetilkerdiş.

 

Qezaya Aliagayê Îzmîrî de cinîya bi nameyê Ozlem Çankaya hetê camêrdo ke ey reyde zewicnaye bî bi nameyê Ahmet Çankaya ke demêk yewbînan ra visyabî, demê pêvînayîşê karî de bi kardî ameye qetilkerdiş.

 

Xeberê qetilkerdişê cinîyan yê ke çapemenî de ca girewtî wina yê:

 

*Çekmekoyê Stenbolî de cinîya bi nameyê Emîne Ulku Araz hetê camêrdê ke ey reyde zewicnaye bî bi çeke ameye qetilkerdiş.

 

*Qezaya Akyaziyê Sakaryayî de cinîya bi nameyê Hatun Ekrem Aslan hetê camêrdê bi nameyê Alî Riza Aslanî ke ey reyde prosesê veradayîşî de bî bi çeke ameye qetilkerdiş.

 

*Bursa de cinîya bi nameyê Tuba Ateşcîye hetê camrêdo bi nameyê Murat Demîrî ke yew serrî verê cu yewbînan ra fek verdabî bi tifingî ameye qetilkerdiş. 

 

*Sevîlay Karliya ke Pendikê Stenbolî de ciwîyayêne, hetê camêrdo bi nameyê Umit Karliyî ke 5 serrî verê cu yewbînan ra fek verdabî ra pê kardî ameye qetilkerdiş.

 

* Samsata yê Semsûrî de Kasim A. Tuna A ya ke ci reyde zewecnaye bî, bacenaxê xo Abîdîn A û tutê ci yê 9 serre Mustafa A.yî pê tifingî qetil kerd.

 

 *Adana de cinîya bi nameyê Nurselî K.ye hetê camêrdo bi nameyê Oktay D.yî ke fek yewbînan ra vera dabî ra sereştişê cayê karî de lebate kerd ke pê tifingî qetil bikero. Nurselî K.ye bi giranî birîndar bî nêweşxane de tadawî vînena. 

 

Platformê Ma do Cînayetê Cinîyan Vindarnî (KCDP) nê qewimîyayîşan ra dima venga çalakîye kerd.