Nazlican Nûjîn Yildiz

 

ÎZMÎR - 6 rojnamegerê ke 13ê Sibate de ameybî destbendkerdiş ra rojnamegere Melîke Aydina ke hepsê keyeyî de yena tepiştiş, qala binpaykerdişê heqan ke wextê destbendkerdişî de înan rê ameyo kerdiş kerd. Melîkeye da zanayîş ke amancê cezaya hepsê keyeyî antişê rojnamegeran ê raşteyan ra yo. 

 

6 rojnamegerê ke 13ê Sibate de ameyî destbendkerdiş ra muxabîra ajansê ma Melîke Aydin, muxabîrê Ajansê Mezopotamyaye (MA) Delal Akyuz, Tolga Guney û xebatkarê çapemenîye ya Partîya Têduştîye û Demokrasîyî yê Şaran (DEM Partî) Fatma Funda Akbulute dimayê cezaya hepse keyeyî ke înan rê ameye dayîş, serbest ameyî verdayîş. Rojnamegerê ke wextê destbendkerdişî de xeylê tedaye bi înan ame kerdiş ra Muxabîra JINNEWSî Melîke Aydine qala binpaykerdişê heqan ê vera înan ke ameyî kerdiş, kerd. Melîkeye dîyar kerd ke hêrişê hemverê çapemenîye esasê xo de hêrişê hemverê azadîya raşteyê resnayîşî yo. Melîkeye ard ziwan ke do vera hepse keyeyî reyna zî xebatê xo dewam bikerê û nê çîyan vat: "Her rewşe de ma do karê xo bikerê.” 

 

Ferzkerdişê ajanîye 

 

Melîkeye dîyar kerd ke wextê destbendkerdişî ra nata vera înan de binpaykerdişî dewam kenê û vat ke na rewşe heme merheleyê destbendkerdişî de zî dewam kerd. Melîkeye ardî ziwan ke wexto ke ameya destbendkerdiş hertim seba kontrolê weşîye mecbur menda ke polîsan îqaz bikera û wina vat: “Nê semedî ra ma muracatê ÎHD û TÎHVî kerd. wexto ke ma berdî edlîye bi saetan ma bi şeklê kelepçekerdişê çep vindarnayî. No binpaykerdişê heqan o. Bi taybetî binpaykerdişê ke ez ci reyde rî bi rî menda estbî. Kesê ke xo sey karmendî dayî naskerdiş, mi ra waştî ke ez înan reyde sohbetêk taybet bikera. Êdî ez nêzanê karmendê çi bî. Polîsê ke serra 2019î de mi destbend kerdî reyna ameyî. O wext zî ajanî bi mi dayî ferzkerdiş. Beno ke reyna eynî çiyî waştbî la elbet mi înan rê vat ez bê avûkatê xo qisey nêkena.” 

 

'Xîret kerdî ke sucêk virazê’ 

 

Melîkeye da zanayîş ke waştî xebatê aye yê rojnamegerîye bêro muhakemekerddiş û vat ke nizdîyê 60 xeberê aye ameyî cipersayîşkerdiş. Sewbîna Melîkeye dîyar kerd ke qiseykerdişê aye yê bi telefonî yê bi rojnamegeranê bînan reyde zî suc ameyî hesibnayîş û vat: “Sucdarkerdişê xeylê bîlasebeb bî û eşkerabî ke qestî wina kenê. Eşkerabî ke waştêne sucêk virazê. Bi taybetî polîsê TEMî wexto ke îfadeyê mi girewtêne xîret kerdî mi tesdîq bikerê. Çîyê ke mi vat nênuştê. Uca de mi fehm kerd ke wexto ke cinî muracatê qereqolî kenê, se yeno sereyê înan û wexto ke muracatê mudirîya polîsan danê îfadeyê cinîyê ke şîdet bi înan yeno kerdiş senî yenê bedilnayîş.” 

 

'Amancê hepsê keyeyî no yo ke rojnamegeran raşteyan ra dûrî bikerê' 

 

Melîke pare kerd ke înan bi avûkatê xo reyde vera qerarê hepsê keyeyî de îtîraz kerdê û dîyar kerd ke dozger zî bi waştişê tepiştişî îtîraz kerdo. Melîke ard ziwan ke rewşa înan hema zelal nîya û vat: “Ma paweyê ci yê, hepsê keyeyî de yê. La qaseyo ke destê ma ra yeno ma xebatê xo dewam kenê. Çîyo ke bi hepsê keyeyî waştî bikerê no bî ke ma raşteyan ra biancê. Çike prosesê weçînayîşî de ma do rojnamegerî bikerdêne. Heme embazê mi yê rojnameger ê ke hepsê keyeyî de ameyî tepiştiş bi no hawa bî."

 

'Hêrişê vera azadîya xeber girewtişî yê şarî yo' 

 

Melîke dîyar kerd ke deme peyênan de aye tewr zêde bi xeberê rojnamegerê ke yenê destbendkerdiş şîyar bena û dîyar kerd ke bi taybetî hemverê çapemenîye de nizdîbîyayîşêk sey destbendkerdiş, tepiştiş û hepsê keyeyî est o. Melîkeye wina dewam kerd: “No nizdîbîyayîş esasê xo de vera ma tena de nîyo. Esasê ci de ez nê caardişan sey hêrişê vera azadîya xebergirewtişê şarî bi name kena. Çike ma xîret kenê ke raştîyan biresnê şarî. Seba venîgirewtişê nê çîyî xîret yeno kerdiş.”

 

'Tewr zêde xeberê ke ardî vernîya ma yê derheqê tecrîdî de bî' 

 

Melîkeye bale ant serê nê çîyî ke xîret yeno kerdiş ke dezgehê ke înan de xebetîyenê bêrê krîmînalîzekerdiş û eynî wextî de kesê ke xebera înan virazenê zî bêrê krîmînalîzekerdiş û wina vat: “Kam ê? Şarê kurdî, xoverdayoxê Agrobayî, xoverdayoxê Akbelenî yê. Zêdeyê 60 xeberan ardî vernîya ma. Zafaneyê înan çalakîyê derheqê tecrîdê Îmraliyî bî. Xîret kenê ke nê çalakîkeran krîmînalîze bikerê. Ma hêrişê înan ra vînenê ke polîtîkayê bîyaye kam keno hedef, vernîya kurdan gênê, dima ra yê seba ekolojîye û cinîyan têkoşîn kenê û sewbîna yê seba kede têkoşîn kenê, kenê hedef." 

 

'Rojnamegerî nîno muhakemekerdiş’ 

 

Melîkeye da zanayîş ke bi destronayîşê kelepulê dijîtal ê rojnamegeran waştî ke nê prosesî de rojnamegerî nêxebetê la do xeberê xo dewam bikerê û pey xeberanê xo de bê û wina qiseykerdişê xo peynî kerd: “Rojnamegerîye nîna muhakemekerdiş. Ma do her rewşe de karê xo dewam bikerê."