Elfazî Toral

 

MÛŞ - Namzeta Hemşaredarîya DEM Partî ya Malazgîrî Gulistan Ozele dîyar kerd ke aye seba îfadekerdişê vîrardişê cinîyan û şaranê rojnamegerîye weçînaya û nika zî sey hemserekatîye do bixebeta ke cinî biba wayîrê vatiş. 

 

Weçînayîşê herêmî ke do 31ê Adare de pê bêro rê roj mend û namzetê partîyê sîyasî xebatê xo dewam kenî. Qezaya Malazgîrî ya Mûşî de zî xebatê namzetê DEM Partî dewam kenê. Weçînayîşê serra 2014î de Partîya Aştî û Demokrasîye (BDP) 3 hezar 343 raye girewt û ser kewt. Serra 2019î de zî Partîya Demokratîke ya Şaran (HDP) 9 hezar 159 raye girewt û ser kewt. La AKP şaredarîye xesp kerd. hemwelatijê Malazgîrî dîyar kerdî ke do weçînayîşê 31ê Adare de bi DEM Partîye reyde ser bikewê. 

 

Namzeta hemşaredarîye ya qezaya Malazgîrî ya Mûşî Gulistan Ozele derheqê xebat û amancê xo de ajansê ma JINNEWSî rê qisey kerd. 

 

'Ez eşkena se bikera?' 

 

Gulîstane rojnamegerêka 24 serrî ya û tuta keyeyêke xebatkar û welatperwer a. Gulîstana ke Unîversîteya Marmaraye de beşe rojnamegerîye qedênaya xo bi vatişê “Ez nê têkoşînî de dayîka xo ra bîya” dana naskerdiş. Gulîstana ke bi serran hetê dewlete ra raştê cîyakarîye ameye, polîtîkayê hêriş û qetilkerdişê dewlete yê serê şarê kurdî vera emrêk zaf şenik de têkoşînî nas kena. Qirkerdişê dewlete yê hemverê keyeyê xo bi nê vatişan ana ziwan: “Mi emrêke şenike de dest bi cipersayîşî kerd. Wexto ke ez nê çîyî fehm bikera ez eşkena se bikera? Mi fikro ke ez senî eşkena nê têkoşînî berz bikera, ganî biverda û aver visna, ez bîya namzet.” 

 

Do biba vengê şarê xo 

 

Gulîstane dîyar kerd ke bi nasnameyê cinî û rojnamegerîye verê xo daya şarê xo û wina dest bi qiseykerdişê xo kerd: "Seba ke ez biba vengê şarê xo bîya rojnameger. Mi têkoşînê xo herêma xo de da destpêkerdiş. Dima ke verweçînayîş virazîya ma dest bi xebatan kerd.” 

 

Gulîstane wina bale ant serê problemê Malazgirî û vat: “Dima ke qeyûm ame tayînkerdiş zîhnîyetê înkar aver kewt. Ziwan û kultur ameyî înkarkerdiş. Sey her reye tîya de zî zîhnîyetê feodal serdest o. Coka ra zî cinî hîna zêde tepîya manena. Ez bi namzetîya xo wazena cinîyan rê biba serkeşe. Qezaye de raşteyê cuye ya cinîyan çin a. Ma amanc kenê ke dimayê serkewtişî ma do cehd bikerê raşteyê cuye seba cinîyan awan bikerê. Seba cinîyan projeyê ma est ê. Cinî do bibî nesneye komelê Malazgirî.” 

 

Sîstemê hemserekatîye 

 

Gulîstane qiseykerdişê xo de wina qala tesîrê hemserekatîye kerd: “Wexto ke şaredarî yeno vatiş camêrd yeno vîrê merdimî. La bi sîstemê hemserekatîye yê DEM Partî nê çîyî raşte ra wedarit. Bi hemserekatîye reyde temsîlîyetê têduştî aver kewt. Dinya de bî nimune. Tîya de vatişê cinîyan yeno qebilkerdiş, cuye rengin bena û hîna zêde hêz pîl beno.”

 

'Cayo ke nîmcet mendo ra dewam bikerê’ 

 

Gulîstane dîyar kerd ke ewro probleme qezaye nêameyî çareserkerdiş û vat: “Ma do cehd bikerê ke probleman çareser bikerê. Ma do keye bi keye bigîrê û xo biresnê her kesî. Ma do seba çareserkerdişê probleman rayîr û raybazan awan bikerê. Ma do zîhnîyeto ke şar vîneno û xizmet danî şar awan bikerê. Serrê verênan de seba cinîyan xeylê projeyê partîya ma est ê. Dima ke qeyûm ame tayînkerdiş heme ameyî betalkerdiş. Ma do cayo ke nîmcet mendo ra dewam bikerê. Ma do seba cinîyanê ciwanan raşteyê newîye awan bikerê. Ma do cehd bikerê ke xo biresnê heme beşê komelî.”