Rozerîn Gultekîn

 

AMED - Namzeta Hemşaredarîya Licê Diyar Dilek Ozere da zanayîş ke bado ke qeyûm ameyo tayînkerdiş tu problemêk Licê de nêameyo çareserkerdiş û wina vat: "Ma bi sozê şaredarîyêke kolektîf vejîyayî rayîr. Ma goreyê waştişê şar û şarî reyde şaredarîye rayîr ra berê.” 

 

Weçînayîşê herêmî yê 31ê Adare rê demêk kilm mend. DEM Partî seba tepîya girewtişê şaredarîyê ke mabenê serranê 2016 û 2019î de hetê qeyûmanê ke ameyî tayînkerdiş ra ameyî xespkerdiş, kuçe bi kuçe bigêrê û xebat rayîr ra berê. Cayê ke îradeyê şarî bi rayîrê tayînkerdişê qeyûman ame xespkerdiş ra yew zî Şaredarîya Licê ya. HDP se ra 77ê rayan girewt, la qeyûm ame tayînkerdiş. Namzeta Hemşaredarîya Licê Diyar Dilek Ozere derheqê têkoşîno ke kena û projeyê xo de qisey kerd. 

 

Têkoşînê bi serran 

 

Diyare qezaya Licê ya Amedî de serra 1986î de mîyanê keyeyêk welatperwer de yena dinya. Mektebê amadekarîye û seretayî tîya de wanena. Dima ra Beşê Fakulteya Edebîyat û Fenî ya Unîversîteya Yuzuncu Yilî ya Wanî wanena. Serra 2014î de bi hawayêkê çalak dest bi sîyasetî kena. Sere de dezgehê tepişteyan de xebetîyena. Di serran MEDTUHAD-FEDî de rayîrberî kena. Serra 2023yî de serekatîya Komeleya Akademîya Cinîyan a Amedî kena. Sewbîna aktivîsta TJAye û endama Komeleya Cinîyan a Rosaye ya. Aye bi xo zî merdimêka tepişteyî ya. Diyare vana ke seba biba vengê zîndanan tîya de xebate dana rayîr ra berdiş. 

 

'Licê de nizdîbîyayîşê heyfgirewtişî est o’ 

 

Diyare ard ziwan ke bi qeyûmê ke 8 serrî yo ameyî tayînkerdiş Licê de nizdîbîyayîşê heyfgirewtişî est o û wina vat: “Seba ke ez vernîya texrîbatê qeyûman bigêra bîya namzet. Nika komel girîyayo binê ablûqa û wazenê bipelçiqnê. Bi polîtîkayê îmha, înkar, asîmîlasyonî wazenê îradeyê şarî xesp bikerê. Şarê kurdî wayîrê hişmendîyêk o. Coka ra zî bi qeyûman nêresayî amancê xo û polîtîkayê şerê taybet vistî dewre. Amancê ma zî no yo ke ma bi nê polîtîkayan sere bikerê. Semedo ke tîya de rayê zêde şinê DEM Partîye coka ra serê tîya de bi taybetî vindenê.” 

 

Do DEM Partî problemê ke qeyûm bîyî sebeb çareser bikero 

 

Diyare da zanayîş ke bi tayînkerdişê qeyûman ê 8 serrî tu problemêk ê sey awe û rayîrî çareser nêbîyî û vat: “Do DEM Partî problemê ke qeyûm bîyo sebeb çareser bikero. Çîyê ke ma do seba cinî û tutan bikerê cuye rojeva ma de yo. Licê de kooperatîfêk ma yê cinîyan est o û ma do nê kooperatîfî zêde pîl bikerê. No zî mîyanê projeyê ma de yo. Dezgehê cinîyan ê ke ameyî girewtiş ma do newe ra akerê û raşteyê asayîşî awan bikerê. Serê lazimîyê komelî ma do projeyê xo bifînî dewre. Ma do çalakîyê komelî seba ciwanan pê bîyarê."

 

'Ganî têkoşînê hemparî bo' 

 

Diyare da zanayîş ke tecrîdê serê Rayberê PKKyî Abdullah Ocalanî her ca de vila bîyo û wina vat: "Seba tecrîd birijîyo zî ma do xebatê xo bikerê. Seba ke ma bibê vengê dayîkê Nobetê Edaletî, seba ke têkoşîn pîl bibo xebat kenê. Ganî têkoşîn hempar bo. Tecrîd nika tesîr serê heme komelî de keno." 

 

'Ganî vatişê şarî esas bêrê girewtiş' 

 

Diyare ard ziwan ke ganî şaredarîye ke vatişê şarî esas gênê dewre de bê û wina peynî kerd: “Seba sozê şaredarîyêke kolektîf ma vejîyayî rayîr. Ma do goreyê waştişê şarî têbigêrê û bi şarî reyde şaredarîye rayîr ra berê. Ganî vatişê şarî esas bêro girewtiş. Perspektîfê partîye yê rayîrberê herêmî est o. Şar ma weçîneno coka ra zî bi nê hişmendîye têgêreno.”