Rozerîn Gultekîn

 

AMED - Hemsereka DEM Partî ya Licê Gulten Gulena ke vera tedaya dewlete de dewa xo terk nêkerd û têkoşînê xo rayîr ra berd wina vat: “Tehdît kerdî la reyna zî ma dewa xo terk nêkerdî. Herre ya ma ya, kede ya ma ya. Kesê ke nê zehmetyan vejenê ê yê.” 

 

Serranê 90î de polîtîkayê çinîkerdişê kurdan bi veşênayîşê dewan kerdêne û kurdî dewanê xo ra vejîyayî û bajaran de bi ca bîyî. Kurdê ke wareyanê xo ra ameyî dûr fînayîş, fek têkoşînê xo ra vera nêdayî. Înan ra yew zî hemsereka Partîya Têduştîye û Demokrasîyî yê Şaran (DEM Partî) ya Licê Gulten Gulene ya. 

 

Gultene dewa Penavî ya Licê de yena dinya û nika 44 serrî ya. Gultene tedaya dewlete û têkoşînê vera nê caardişan vat. 

 

Dewlete keyeyê aye veşêna, heywanan qetil kerd 

 

Gultene dîyar kerd ke keyeyê aye 1990î de ame veşênayîş û vat: “Dewlete 90î de dewa ma, keyeyê ma veşêna. Nêverdayî ma kelepulanê xo bivejnê teber. Hende zilm kerdî, nika weriştî qala dîn û îmanî kenê. Înan de dîn û îman çin o. Eke biyayêne do wina nêkerdêne. Seba çîyê ke ameyî kerdiş nêrê vîrîkerdiş ma tutanê xo rê qalî kenê. Keyeyê ma veşênayî. Heywananê ma qetil kerdî. Ma tehdîd kerdî. La ma dewa xo terk nêkerd.” 

 

Hem heywanan weye kena hem zî hemserekîye kena 

 

Gultena ke hemsereka DEM Partî ya Licê ya, eynî wextî de bi pesdewarî reyde zî meşgul bena û wina dewam kerd: “Ma cinîyê kedkar ê. Roja ke zewecîyaya no 15 serrî yo mabenê dew û qezaye de timî şina û yena. Ez xebatê partîya sîyasî û cuya dewe pîya rayîr ra bena. Serê sibayî ez saet 07.00î de wirzena şina ewnîyena heywanan û baxçe. Dima ra ez şina qeza tewrê xebatan bena. Ma xebatê xo siba rê nêverdenê. No 30 serrî yo ke ez bi hawayêkê aktîf xebatan de ya. Di demê ke ez hemserekîye kena. Ez zerrî ra xebatê partiye rayîr ra bena.”

 

 ‘Ma vera tecrîdî de xover danê’ 

 

Gultene da zanayîş ke sey şarî tedaye ra nêtersena û wina vat: “Vera astengîyan de heme raşteyan de xebatê de dewam kenê. Ganî her çî ra ver tecrîd bêro şikitiş. Ma sey şarî vera tecrîdî de xover danê. Ma do şaredarîyanê xo newe ra bigîrê. Ê ma bikişî zî ma nêtersenê û ma do çîyê aîdê xo tepîya bigîrê. Wa qeyûm nê çîyî wina bizano. Ma do serê herra xo de bê. Ma tepîya game nêerzenê.” 

 

Licê de pesdewarî kêmî beno 

 

Gultene qiseykerdişê xo de bale ant serê krîzê ekonomîye zî û wina peynî kerd: “Krîz sey her cayî tesîrêk negatîf serê Licê de zî kerdo. Raşteyo ke tewr zêde tesîr bîyo pesdewarî yo. Coka ra pesdewarî qezaye de her ke şino kêm beno.”