Marta Somek

 

STENBOL - Avûkate Francesca Trasattî ya ke Delegasyonê Huqûqnasê Mîyanneteweyî yê Vera Tecrîdî de ca gêna û Amed û Stenbol de xeylê zîyaretan pê ard, vat: “Qanûnê neteweyî û mîyanneteweyî yeno binpaykerdiş û serê Ocalan û zîndanan de tecrîd yeno rayîr ra berdiş. Wedaritişê tecrîdê serê Ocalanî babetêke muhîm o. Îmrali adresê raşt ê çareserîye yo. Çike Ocalan nasname û têkoşînê şarê kurdî temsîl keno.” 

 

Rayberê PKKyî Abdullah Ocalan 26 serrî yo binê tecrîdêke giran de yeno tepiştiş û 35 aşmî yo tu xeberêke ci ra nîna girewtiş. "Delegasyonê Mîyanneteweyî yê vera tecrîdî û seba çareserîya problemê kurdî" ke 12 avûkatê Swêd, Başûrê Afrîka, Ispanya, Îtalya û Norveçî ra tede ca gênê vera tecrîdî de mabenê 28-29ê Sibate de Amed de zîyaretan pê ard. Heyetî 1ê Adare de bi temsîlkarê komelê sivîl û avûkatê Buroyê Huqûqî yê Asrinî yê Stenbolî reyde zîyaret pê ard û 2yê Adare de şûbeyê OHDyî yê Beyoglu yê Stenbolî de otelêke de konferansê ‘vera sîyasetê tecrîdî de rijîyayîşê aştî û azadîye’ pê ard. 

 

Endama Partîya Potera al Popolo ya Îtalyaye û endama Baroyê Roma avûkate Francesca Trasattî ya ke heyete de ca girewtêne JINNEWSî rê qisey kerd. 

 

‘Serê Ocalan û zîndanan de tecrîd yeno awankerdiş’ 

 

Francescaye da zanayîş ke heqê merdiman heqê ferz ê û vat: “Cinîyê kurdî hetê şikitişê tecrîd û heqê merdiman de waştişan kenê. Tebîî qet şik çin o ke cewabê nê waştişan nîno dayîş. Tirkîya de babeta demokrasî û heqê merdiman problem o. Qanûnê neteweyî û mîyanneteweyî yeno binpaykerdiş. Serê Ocalan û zîndanan de tecrîd yeno awankerdiş. Na rewşêke bêhuqîqî ya.” 

 

‘Vera tecrîdî de têkoşînê yewbîyaye’ 

 

Francescaye dîyar kerd ke wedaritişê tecrîdê serê Abdullah Ocalanî muhîm o û wina vat: “Welatêk de binpaykerdişê heqan tena problemê ê welatî nîyo. No seba pêroyê dinya tehluke yo. No problemêke global o. Ganî vera nê problemî de têkoşînêk yewbîyaye bibo.”

 

 ‘Ma teda bi CPTyî kerd’ 

 

Francescaye ard ziwan ke Konseyê Ewropa qaseyê dewletêke wayîrê hêz o ke teda bi Komîteya Vernîgirewtişê Muameleyo Xirab û Îşkenceyî ya Ewropa (CPT) bikero û wina vat: “Enstrumanêke ma yê huqûqî bi qaseyê nê hêzî çin o. No problemê awankerdişê rayaumûmî yo. CPT raporê 2022yî eşkera nêkerd. Nîno zanayîş ke senî pêvînayîş ameyo kerdiş. Aşma verêne de ma kombîyayîşê xo yê Komîsyonê Têkilîyê teberî de huqmat ra waşt ke teda bi CPTyî bêra kerdiş ke raporê xo eşkera bikero. Tena rayîrê ma no yo ke ma bîyarê rojeve. Sewbîna metodêk çin o.”

 

 ‘Adresê çareserîye Îmrali yo’ 

 

Francescaye qiseykerdişê xo yê peyênan de vat ke adresê çareserîye Abdullah Ocalan o û wina peynî kerd: “Îmrali adresê çareserîye yo. Qanûnê neteweyî û mîyanneteweyî yeno binpaykerdiş û serê Ocalan û zîndanan de tecrîd yeno rayîr ra berdiş. Wedaritişê tecrîdê serê Ocalanî babetêke muhîm o. Îmrali adresê raşt ê çareserîye yo. Çike Ocalan nasname û têkoşînê şarê kurdî temsîl keno.”