Oznûr Deger

 

RIHA - Rayirbera Komeleya Paştîdayîşê Cinîyan a Yaşamevî Sevînç Îzole derheqê 8ê Adare de qisey kerd û vat: “Ma hêzê xo cinîyan ra gênê. Sloganê ‘jin jiyan azadî’ do sloganê ma yê tewr esas bo. Ma venga heme cinîyan kenê. Ma do 8ê Adare de biherikîyê raşteyan û wayîrê heq û cuya xo bivejê.” 

 

Ver bi 8ê Adare Roja Cinîyanê Dinya ra welat de têkoşîn û xoverdayîşê cinîye her ke şino zêde beno. Cinîyê ke vera şîdetê camêrdî de sere çewt nêkenê, bajarê ke tede manenê de startê 8ê Adare dayî û venga têkoşînî kerdî. 

 

Riha de zî cinîyan bernameyê çalakîyan ê 8ê Adare eşkera kerdî û venga heme cinîyan kerdî ke biherikîyê raşteyan. Rayirbera Komeleya Paştîdayîşê Cinîyan a Yaşamevî Sevînç Îzole derheqê 8ê Adare de ercnayîş kerd û venga heme cinîyan kerd ke biherikîyê raşteyan. 

 

‘Ma fek cuye û heqanê xo ra vera nêdanê’ 

 

Sevînçe da zanayîş ke proseso ke şîdetê camêrd û dewlete zêde bîyo de 8ê Adare pêşwazî kenê û wina qiseykerdişê xo dewam kerd: “Rojêke de 8 cinîyî yenê qetilkerdiş. Ma prosesêk winasî de şinê 8ê Adare. Tebîî qet şik çin o ke sebebê zêdebîyayîşê şîdetê camêrd-dewlete polîtîkayê bêcezaverdayîşî yo. Ma vanê kiştişê cinîyan polîtîk o. Sebebe ci zî polîtîkayê bêcezaverdayîşî yo. Seba ke kiştişê cinîyan bêro vindarnayîş ganî dewlete bi lezkî agêra pêkerdişê mîyanneteweyî û peynîya polîtîkayê bêcezaverdayîşî bîyara. Ma cinîyî zî do vera qetilkerdişê cinîyan de heqê cuya xo bipawê. Ma fek cuye û heqanê xo ra vera nêdanê.”

 

‘Sloganê ma yê esasî ‘jin jiyan azadî’ yo’ 

 

Sevînçe qiseykerdişê xo yê peyênan de da zanayîş ke 8ê Adare de her ca de bî, qisey bikerê û waştişanê xo bîyarê ziwan û wina vat: “Ma hêzê xo cinîyan ra gênê. Sloganê ma yê esas ‘jin jiyan azadî’ yo. Ma do heme çalakî û xebatanê xo de bîyarê ziwan. Ma do bajar de wayîrê temsîlkarîya têduştîye bivejîyê. Ma venga heme cinîyan kenê ke biherikîyê raşteyanê 8ê Adare û wayîrê heq û cuya xo bivejê.”