WAN - TJA û MEBYA - DERî bi wesîleya 8ê Adare şî serdana gorê cinîyê ke ameyê qetilkerdiş.

 

Wan de Tevgerê Cinîyê Azade (TJA) û Komeleya Yewîye û Kulturî yê Paştdayîşî bi Keyeyê ke Merdimanê Xo Dergûşê Şaristanîyî yê Mezopotamyaye de Vînî Kerdê (MEBYA DER) çarçewaya çalakîyê 8ê Adare Roja Cinîyan ê Dinya de Goristanê Yenîmahale yê qezaya Rêya Armûşî ya Wanî de serdayîşê gorê cinîyê ke têkoşînê azadîya cinî de dinyaya xo bedelnayî, kerdî.

 

'Do bi serkêşîya cinîyanê azadan pê bêro'

 

Dimayê rêzgirewtişê Hemsereka MEBYA  -DERî Hanim Kaya, 8ê Adarê pêro cinîyan rê pîroz kerd û vat: "Ma serê goristanê embazê ma yê ke têkoşînê azadîya kurdî de dinyaya xo bedelnayî, soz danê. Heta ke ma xeyalê înan ê Kurdistanêk azad pê bîyarê ma do serê rêça înan de têkoşînê xo dewam bikerê." Hanime tecrîdê serê Rayberê PKKyî Abdullah Ocalanî zî şermezar kerd û vat, "Tecrîdê serê Rayberê Şarê Kurdî tecrîdê serê cinî û ciwanê kurdî yo. Sedemê qetilkerdişê cinîyan tecrîd o. Demo ke cinî azad bibê, do her çî azad bibo. Do bi serkêşîya cinîyê azadî pê bêro." 

 

Cinîyan dimayê qiseykerdişê serdayîşê gorê cinîyan kerdî û qurnefîlî dayî serê gorê înan û dua kerdî.